Губење на сакана личност, расправија со соседи, инфекција или пад – односно било каков психички и физички стрес може да бидат тригери за скршено срце, покажало истражување спроведено во Германскиот центар за истражување на кардиоваскуларни болести.
Дотолку повеќе, научниците утврдиле дека физичкиот стрес може да биде поопасен од емоционалниот, кога станува збор за скршено срце.
Болеста која е позната по името синдром на скршено срце предизвикува слична состојба како срцевиот удар, но при неа срцевите крвни садови не се запушени. И покрај тоа, срцето слабо чука, пациентот останува без воздух и чувствува болка во градите.
Зошто и како точно се развива болеста, во медицинската литература позната и како Такоцубо кардиомиопатија, се уште не е познато. Се знае единствено дека е почеста кај жените во постменопауза, дека може да ја предизвика емоционално исцрпувачко случување и акутен физички стрес, како и дека срцето може да го „скршат“ дури и среќни и позитивни случувања.
Во фокус на истражувањето бил физичкиот стрес како тригер и откриено е дека инфекциите, сообраќајните несреќи и останати случувања кои телото го доведуваат во состојба на стрес, почесто предизвикуваат состојба на скршено срце кај мажите.
Научниците сметаат дека клучно откритие е она што е долгорочна последица, а тоа е дека сериозните компликации, како срцеви аритмии, затајување на срцето, мозочен удар или Такоцубо синдром се почести кога тригер е физичкиот стрес, а тоа е група на пациенти кои имале и поголем ризик од смртност воопшто.
