Единаесет месеци, повеќе од 700 часа и 56 000 Лего коцки му биле потребни на десетгодишно момче со аутизам од Исланд да ја изгради најголемата реплика на бродот Титаник од Лего коцки.
Уникатното дело на Брајњар Карл Биргисон од неодамна е премиерно изложено во музејот „Титаник“ во Тенеси. Репликата е долга седум метри, а висока 1,5 метри. Младиот Исланѓанец вели дека веќе пет години ужива во играњето со Лего коцки.
„Си играв со часови. Некогаш градев познати градби, а некогаш измислував некои свои“, вели Биргисон.
Десетгодишното момче вели дека преку градењето на Титаник успеал да го прифати својот аутизам
Како што поминувале годините, Биргисон станал опседнат со возови, се додека еден ден не отишол на риболов со својот дедо Лудик, кој во него го пробудил интересот за бродовите. Додека да наполни десет години, знаел речиси се што може да се знае за Титаник.
„Кога патував со мајка ми во Леголенд во Данска, видов неверојатни модели на познати куќи, авиони, локации и бродови. Тогаш почнав да размислувам дека и јас сакам да го направам мојот Лего модел“, открило момчето кое навистина успеало во своите намери.
Брајњар со помош на пријатели и семејството собрал пари за купување на Лего коцките. Вели дека преку градењето на Титаник успеал да го прифати својот аутизам. Пред да започне својот проект, имал потешкотии со комуникацијата, што го правело несреќен и осамен. Денес има доволно самодоверба за сам да дава интервјуа за своето постигнување.
