Колкав е ризикот да се заразите со коронавирус во јавен превоз?

Веројатноста дека ќе се заразите со КОВИД-19 во јавен превоз во голем процент зависи од тоа каде седите и колку сте близу до инфицираниот патник, покажале светските истражувања.

Студија која опфатила илјадници патници во брзите кинески возови, открила дека опасноста од пренесување на заразата помеѓу патниците варирала од близу нула до 10 проценти. Оние кои седеле најблиску до заразени патници секако биле најизложени на опасноста.

“Иако постои зголемен ризик од пренесување на КОВИД-19 во возовите, нашето истражување покажува дека изборот на место на кое седите и времето на патување кое го минувате во релативна близина на заразени лица, влијаат на можноста на пренос на вирусот“, вели д-р Шенгјие Лаи од Универзитетот во Саутемптон.

Наодите сугерираат дека за време на епидемијата е важно да се намали густината на патници и да се промовираат мерки на лична хигиена, задолжително да се користи маска и евентуално да се мери телесната температура пред патувањето, додаваат стручњаците.

Различни неодамнешни истражувања од целиот свет укажуваат на тоа дека носењето маска и одржувањето на физичкото растојание го намалува ризикот од зараза во јавниот превоз.

Визуелизација покажува дека маските драстично го намалуваат ширењето на капките.

Службите за јавно здравје во Париз утврдиле дека ниту едно од 386. градски жаришта на КОВИД-19 помеѓу мај и средината на јули не биле поврзани со јавниот превоз. До слични сознанија дошле и истражувачите во Токио и во некои делови на Австрија.

Во нова студија објавена во списанието Clinical Infective Diseases, истражувачите ги анализирале информациите за патници кои патувале со кинески возови помеѓу средината на декември 2019. и крајот на февруари 2020. Идентификувани биле над 2.300 патници, “нулти пациенти“ кои развиле КОВИД-19 во период од две недели по патување со воз. Обработени биле и повеќе од 72.000 патници кои седеле во близина на тие “нулти пациенти“, и тоа три реда по ширина и пет реда по должина.

Поради патување со воз се заразиле само 234 од 72.000 патници, односно 0,32 проценти. Таа стапка била најголема кај оние кои седеле до заразен патник – 3,5 проценти. Просечната стапка на заразеност кај оние кои седеле во ист ред, но подалеку од заразеното лице била 1,5 проценти. Тоа е десет пати поголема веројатност отколку да седеле само еден или два реда подалеку, покажало истражувањето.

Илустрација од истражувањето  кое покажува како опасноста од зараза опаѓа со оддалечено седење од заразено лице.

На пренесување на заразата влијаело и времето поминато во воз. Просечно, стапката на веројатност дека патникот ќе се зарази, се зголемувала за 0,15 проценти со секој час поминат на патувањето; кај оние кои седеле покрај заразено лица, таа стапка растела побрзо: 1,3 проценти за секој час.

Но, се чини дека опасноста од зараза паѓала штом заразеното лице ќе излезело од возот. Од 1342 патници кои подоцна седнале на истото седиште, заболел само еден патник. Тоа значи дека стапката на пренос на заразата изнесувала само 0,075 проценти.

Истражувачите заклучиле дека ширењето на КОВИД-19 во јавниот превоз може да се спречи, ако помеѓу патниците се остават две празни места во рамките на ист ред и времето на патување би се ограничило на максимум три часа.