Интервју со проф. д-р Елена Трајковска-Докиќ: Молекуларните методи се најдобри за истражување, даваат точни и брзи резултати!

Работите како во медицината, така и во микробилогијата се менуваат многу брзо, особено во последните неколку години. За разлика од минатото кога микробиолозите немале доволно алатки и апаратура за испитување и доаѓање до некои резултати, во последните 10 години се соочуваме со многу голем напредок во техниката, технологијата и во микробилогијата, објаснува проф.  д-р Елена Трајковска-Докиќ, која беше еден од предавачите на 6. Конгрес на микробиолози кој се одржа во Охрид, а во чии рамки професорката на Медицинскиот факултет во Скопје одржа интересно предавање на тема „Нови предизвици и решенија во дијагностичката микробиологија“, каде прикажа кратка ретроспектива на она што се случувало во светот на микробилогијата пред 30 години и сега.

За разлика од минатото кога микробиолозите немале доволно алатки и апаратура за испитување и доаѓање до некои резултати, ние во последните десет години се соочуваме со многу голем напредок во техниката, технологијата, медицината воопшто, па така и во микробилогијата, вели проф. д-р Трајковска-Докиќ

Кои се Вашите првични впечатоци од Конгресот, дали Вашите очекувања се исполнија и колку генерално ваквите конгреси се од значење за микробиолозите, особено за младите?

Проф. д-р Трајковска-Докиќ: Навистина ми беше чест да учествувам со едно мое предавање во првата сесија од овој 6. Конгрес на микробиолози на Македонија заедно со симпозиумот на ФЕМС. Ова е наш шести конгрес, како што минуваат конгресите, така се зголемува искуството и конкретно можам да кажам за овој иако не е голем според бројот на учесници, сепак е многу квалитетен и има голем број на истакнати предавачи. Јас земав учество со тема „Нови предизвици и решенија во дијагностичката микробиологија“ и како мотив, предизвик зошто ја направив оваа тема беше моето искуство, долгодишно во светот на микробиологијата, односно фактот дека работите како во медицината, така и во микробилогијата се менуваат многу брзо, особено во последните неколку години.

За какви промени точно станува збор, дали можете да направите една паралела на она што се случувало пред 30 години и сега, разлики има, но кои се тие?

Проф. д-р Трајковска-Докиќ: За разлика од минатото кога микробиолозите немале доволно алатки и апаратура за испитување и доаѓање до некои резултати, ние во последните десет години се соочуваме со многу голем напредок во техниката, технологијата, медицината воопшто, па така и во микробилогијата. Сведоци сме на таканаречените молекуларни методи коишто се многу брзи, софистицирани, се одликуваат со голема специфичност и сензитивност, односно даваат многу веродостојни, брзи и точни податоци и тоа навистина е предизвик за секој микробиолог. Токму поради тоа и направив една ретроспектива на дијагностичката микробиологија која што всушност е основна алатка во нашата секојдневна пракса, нашето искуство го црпиме употребувајќи ги сите овие дијагностички процедури.

На што се должи растот и развојот на дијагностичките процедури?

Проф. д-р Трајковска-Докиќ: Се должи на растот и развојот во светот, пред се, а ние ги следиме тие промени. Се разбира, притоа мораме да ги разгледаме и нашите можности, затоа што апсолутно не секој апарат можеме да си го дозволиме. Затоа секогаш пред да истражуваме нешто најпрвин ги разгледуваме можностите, а потоа и потребите, па земајќи предвид се, бираме на кое истражување ќе работиме.

 

Пред да истражуваме нешто најпрвин ги разгледуваме можностите, а потоа и потребите, па земајќи предвид се, бираме на кое истражување ќе работиме, вели проф. д-р Трајковска- Докиќ

Кои се главните измени кои се случиле неодамна во технологиите и техниките, а се достапни во микробиолошките лаборатории?

Проф. д-р Трајковска-Докиќ: Дефинитивно тоа е преминувањето на молекуларни методи. Благодарение на нив резултатите се побрзи, поточни и ова се клучни фактори коишто ги прават овие методи најдобри за истражување.