Пишува: Александра Стојановска/saska@panacea.mk
Од 3. до 6. октомври годинава, во Охрид ќе се одржи шестиот Конгрес на Македонското здружение по кардиологија, на кој е планирано и меѓународно учество на медицински експерти. За тоа што ќе биде главната тема на престојниот Конгрес, и што може да се очекува од него, разговаравме со проф. д-р Елизабета Србиновска-Костовска, претседател на Македонското здружение по кардиологија.
Професор Србиновска, за кого е наменет престојниот, 6. Конгрес по кардиологија?
Проф д-р. Србиновска-Костовска: Конгресот е наменет за кардиолози, специјализанти по кардиологија и други професионалци кои работат во областа на кардиологијата, а кои можат да учествуваат во различни теми од кардиоваскуларната медицина. Ваквата размена на искуства на регионално, европско и меѓународно ниво ќе овозможи следење и остварување на мисијата на Европското здружение за кардиологија, која исто така е прифатена од нашето здружение, а тоа е “да го намалиме товарот од кардиоваскуларните болести”. Истовремено овој стручен собир претставува и можност за размена на искуства за најновите научни и професионални достигнувања во кардиологијата и за слушање и запознавање на нови колеги од земјата и странство.
За време на овој стручен настан, ќе се одржи и првиот Балкански конгрес на медицински сестри и техничари
Кои ќе бидат главните теми за кои стручно ќе се разговара на Конгресот?
Проф д-р. Србиновска-Костовска: Една од главните теми на конгресот ќе бидат кардиоваскуларните сликовни техники, кои се многу важен сегмент во поставувањето на дијагнозата, прогнозата, одлуката за третман и следење на кардиоваскуларните заболувања. Коронарните и структурните миокардијални заболувања третирани со перкутани интервенции, срцевите аритмии и болест на периферните артерии ќе бидат темите кои исто така ќе бидат во фокусот на Националниот Конгрес на Македонското здружение по кардиологија. Секако дека и коронарната артериска болест, срцевата слабост, кардиомиопатиите, превентивната кардиологија, фармакотерапијата, кардиохирургијата, педијатриската кардиологија и други кардиоваскуларни заболувања ќе имаат свое место за презентација и дискусија на овој стручен настан. Целите на секоја сесија на конгресот ќе бидат најновите упатства за третман на кардиоваскуларните заболувања од Европското кардиолошко здружение.
Што сè е предвидено да се реализира за време на Конгресот?
Проф д-р. Србиновска-Костовска: Конгресот е составен од пленарни сесии со домашни и меѓународни експерти, симпозиуми, орални и постер презентации во областа на современата кардиоваскуларна медицина. Истовремено, за време на конгресот ќе бидат организирани ии неколку практични сесиии.
Има ли Македонското здружение за кардиологија поддршка и од странски асоцијации и здруженија?
Проф д-р. Србиновска-Костовска: Среќна сум што нашиот конгрес ќе биде поддржан од Европското здружение за кардиологија. Планираме заеднички сесии на Македонското здружение по кардиологија и Европското здружение за кардиологија и со Бугарското здружение за кардиологија – Работна група за жени и кардиоваскуларен ризик. Она кое сакам да го нагласам е дека за време на овој стручен настан, ќе се одржи и првиот Балкански конгрес на медицински сестри и техничари.
