Пишува: Александра Стојановска/saska@panacea.mk
Идната недела во Скопје по трети пат ќе се одржи Конгрес на Здружението на уролози на Македонија, на кој е предвидено да има и основачка конференција на Балканското Здружение на уролози. По тој повод, разговаравме со доц. д-р Оливер Станков, претседател на Здружението на уролози на Македонија.
Која е мисијата и целта на овој трет по ред конгрес на Здружението на уролози на Македонија?
Доц. д-р Станков: Мисијата на конгресот е да ги доведе македонските, европските и интернационалните колеги заедно на едно место и да им овозможи плодна размена на искуства, идеи и знаење, како подобрување на вештини и воведување на нови техники и технологии.
Она што сакам да го нагласам е дека, во рамките на овој конгрес предвидено е да се одржи и основачка конференција на Балканското Здружение на уролози. Целта на основачката конференција е да се постават основите на едно Балканско здружение во кое ќе се вклучат Здруженијата на уролозите од регионот и заеднички преку тесна соработка да придонесат кон унапредување и развој на урологијата, како и импмлементација на новитети во своите држави.
Кои теми ќе бидат застапени на конгресот?
Доц. д-р Станков: Годинава, ќе бидат опфатени повеќе теми. Пред се, урологијата, но и нефрологијата, патологијата, онкологијата, трансплантацијата, уринарните инфекции и вариа.
Научната програма ќе вклучува предавања, симпозиуми, дискусии и работилници, каде на едно место ќе бидат презентирани најновите достигнувања во дијагностика и лекување од областа на урологијата. Очекуваме колеги од регионот и од странство, се со цел заеднички да споделиме до каде се дојдени медицинските новини во урологијата.
Конгресот ќе се одржи од 09 до 11 ноември во Македонската академија на науки и уметности во Скопје.
