Пишува: Катерина Шекеровска-Димовска/katerina@panacea.mk
„Добрата кондиција и здравје се едни од главните предуслови за успешно соочување со сите предизвици и динамични темпа кои ги наметнува музичката кариера. Доколку си во добра психофизичка форма тоа се осеќа на сцената и често со твојата енергија го поведуваш бендот и публиката, а кога си во студио и имаш напорни целовечерни снимања токму добрата форма ќе ти помогне во критичните моменти на замор да издржиш и да не го жртвуваш квалитетот на работата“, вели Владимир Василевски-Четкар, македонски џез-музичар, кој живее и работи во САД. Со него може да се зборува на многу теми, но овојпат, акцентот го ставаме на здравиот начин на живот, спортувањето, и воопшто начините на кои ја одржува својата форма.
Владимир, Вие сте поборник на здравиот живот и воопшто на максимата, во здраво тело-здрав дух. Колку и да звучи клише, тоа е вистина, која на крајот сите ја сфаќаме. Како успевате да одржите, да направите баланс помеѓу патувањата, настапите, снимањата и водењето здрав живот? Тешко ли е да го постигне тоа музичар од ваш калибар?
Четкар: Добрата кондиција и здравје се едни од главните предуслови за успешно соочување со сите предизвици и динамични темпа кои ги наметнува музичката кариера. Доколку си во добра психофизичка форма тоа се осеќа на сцената и често со твојата енергија го поведуваш бендот и публиката, а кога си во студио и имаш напорни целовечерни снимања токму добрата форма ќе ти помогне во критичните моменти на замор да издржиш и да не го жртвуваш квалитетот на работата. Уште како мал обожував физички да бидам активен и редовно спортував и вежбав па подоцна ми беше природно покрај музиката најдам време и за своето тело и дух.
Навистина верувам дека за добро здравје покрај здрава исхрана и сон потребна е и позитивна мисла
Живеете во САД, но престојувате добар дел од годината и во Македонија, најмногу во родниот Охрид. Имате ли навики во однос на здравиот начин на живот кои ги носите секаде со себе?
Четкар: Каде и да сум во светот, секогаш првенствено се трудам да јадам многу зеленчук и овошје, исто така редовно консумирам риба, свежо месо и сирења. Голем гурман сум, но секогаш се трудам да ги потрошам калориите кои ги внесувам. Си верувам себеси и на мојот карактер така што и кога ми се случува да не можам да најдам време за редовно вежбање не се секирам многу бидејќи знам дека кога ќе стивне работната бура веднаш се враќам во формата која ја посакувам.
Внимавате на изгледот, вежбате, а новите места ги откривате авантуристички, на велосипед, за што е потребна добра кондиција. Како всушност ја негувате формата? Имате ли некои „тајни“?
Четкар: Како што спомнав претходно, вежбам и се грижам за своето тело уште од пред тинејџерските години и тоа исклучиво природно. Можеби е тоа главната причина што не сум варирал никогаш драстично од мојата стандардна форма. Исто така никогаш во ниту еден момент не сум користел никакви спортски суплементи освен квалитетна исхрана што иако поспоро, сепак, е сосема доволно за одлични ефекти. Велосипедот ми е, исто така, огромна љубов и ми дава чувство на апсолутна слобода. Токму некои од најубавите музички теми ми слетале во главата дури сум возел велосипед. Во Њујорк, исто така, редовно возам велосипед и верувајте ми стигнувам побрзо до својата дестинација од оние кои се возат со автомобили.
Музичката терапија во разни облици е се попопуларна во светот и е една од најпотентните стимуланти на човечкиот дух и расположение
Препознатлив сте по широката насмевка, ведрината, позитивноста со којашто зрачите. Ќе се согласите, ова се особини кои се помалку ги забележуваме на луѓето околу нас. Многу или малку му е потребно на човек за среќа?
Четкар: Најискрено мислам дека многу малку е потребно за човек да биде позитивен и исполнет. Некои од најсреќните луѓе кои сум ги запознал во животот не биле милионери и не живееле во некоја метропола туку напротив сум ги запознал во некои мали селца и гратчиња во централна Америка и југоисточна Азија и биле големи работници со скромни примања меѓутоа со искрени души и срца полни со љубов и страст.
Дали сте од оние мажи кои се плашат и од самото спомнување на професијата доктор и колку се грижите за себе во смисла на редовни прегледи? Што сметате дека е најбитно за добро здравје?
Четкар: На доктор (не дај Боже!) одам само доколку осетам потреба од тоа. Нормално со текот на годините добро е почесто да практикуваме прегледи. Навистина верувам дека за добро здравје покрај здрава исхрана и сон потребна е и позитивна мисла.
„Мислам дека музиката сама по себе исцелува. Тоа е еден експлозивен израз на човештвото. Нешто од кое сите сме допрени. Без оглед на тоа од која култура сме, секој ја сака музиката“, ќе истакне американскиот музичар Били Џоел во една прилика. Се согласувате ли со многубројните истражувања кои ја потврдуваат универзалната врска на музиката и нејзиниот терапевтски потенцијал?
Четкар: Сигурно дека се согласувам. Музичката терапија во разни облици е се попопуларна во светот и е една од најпотентните стимуланти на човечкиот дух и расположение.
