Интолеранцијата на лактоза не е алергија на млеко

Интолеранцијата на лактоза настанува кога во тенкото црево не постои ензимот лактаза или клетките на дигестивниот систем не произведуваат доволни количини од овој ензим, кој ги разградува шеќерите од млекото на прости јаглехидрати

Интолеранцијата на лактоза не е болест или сериозно пореметување. Симптомите исчезнуваат кога ќе престанете да се консумирате млечни производи и ги користите само оние кои не содржат лактоза, кои што, пак, ги има сѐ повеќе на пазарот.

Интолеранцијата на лактоза настанува кога во тенкото црево не постои ензимот лактаза или клетките на дигестивниот систем не произведуваат доволни количини од овој ензим, кој ги разградува шеќерите од млекото на прости јаглехидрати.

Иако не е опасен, овој феномен може значително да го намали квалитетот на животот, бидејќи нетолеранцијата на лактоза бара внимателна исхрана. На прв поглед, се чини дека  би се решила лесно, ако едноставно не консумирате млеко и млечни производи. Сепак, оваа храна е главен извор на калциум и е ризично постојано да с еизбегнува бидејќи така значително ќе се зголеми ризикот од фрактури, остеопороза и хипертензија, а ќе се намали внесот на хранливи материи како што се протеините и витаминот Б2.

Интолеранцијата на лактоза има три форми.

Вродена интолеранција настанува од раѓањето и е резултат на недостатокот на ензимот лактаза во тенкото црево.

Стекната интолеранција настанува во адолесценцијата или подоцна и  се јавува кога клетките на дигестивниот тракт не произведуваат доволно количество на ензимот лактаза.

Секундарна интолеранција е минлива состојба и е резултат на недостаток на лактаза која произлегува од оштетувања на тенкото црево и намалување на неговата функционална површина, што се сретнува кај лица кои имале инфекција на органите за варење, предизвикана од бактерии и вируси.

Доколку планирате нетолеранцијата на лактоза да ја надминете со исфрлање на млекото, треба да знаете дека млечниот шеќер го има и во ферментираните млечни производи, но во мали количини. Лактозата се среќава и во засладувачите, во 20 отсто од лековите, во чоколадото и кај некои прреработки од месо. Млекото содржи најмногу лактоза. Има и намирници кои содржат скриена лактоза, како што е лебот, преработени житарици, маргарин, преливи за салата, бонбони, грицки, кекси и торти.

Она што е многу важно да се знае е фактот дека интолеранцијата на лактоза не е алергија на млеко. Имунолошкиот систем, кога станува збор за алергија на млеко, млечните протеини ги смета за непријатели, додека нетолеранцијата на лактоза е проблем на дигестивниот систем каде имунитетот не игра никаква улога.