Новата верзија на КОВИД-19 значително е позаразна од претходната верзија на коронавирусот, покажало ново истражување со кое се заклучило дека таа нова варијанта ја зголемува репродукцијата или т.н. број Р за 0,4 до 0,7.
Последниот број Р во Велика Британија се проценувал помеѓу 1,1 и 1,3, а би требало да биде понизок од 1,0 за да бројот на случаи на инфекции почне да се намалува.
Професор Аксел Ганди од Империал Колеџот во Лондон вели дека разликите помеѓу типовите на вирусот се “прилично екстремни“.
“Голема е разликата во тоа колку лесно се шири оваа варијанта на вирусот, во однос на претходната“, додава тој.
Резултатите од студијата што ја спровеле научниците од Имперал Колеџот укажуваат на тоа дека заразата со новиот сој на коронавирусот тројно се зголемила за време на затворањето во Велика Британија во ноември, а претходната негова верзија се намалила за една третина.
Бројот на случаи на инфекции со КОВИД-19 брзо почна да се зголемува за време на вториот бран, а бројот на случаи на заразени евидентиран во еден ден, мината недела го достигна максимумот.
Претходните резултатите упатуваа на тоа дека вирусот побрзо се шири помеѓу помладите од 20 години, особено децата на средношколска возраст, но најновите податоци покажуваат дека тој побрзо се шири меѓу сите возрасни груои, вели еден од членосите на истражувачкиот тим, проф. Ганди.
Проф. Џим Наисмит од Универзитетот Оксфорд вели дека новооткриената варијанта на вирусот наскоро ќе поттикне воведување на уште построги рестриктивни мерки.
“Податоците од Империал Колеџот се најдобрата досегашна анализа и имплицираат дека досега применетите мерки нема да успеат да го намалат бројот Р под 1, ако не се спречи ширење на новиот сој на коронавирусот“, вели тој.
