Децата често се жалат на болки поврзани со растот, во колената или потколениците, во вечерните часови или преку ноќта.
Тоа се случува кога коските растат и им „кажуваат“ на мускулите дека и тие, исто така, мора да се издолжат. Ако мускулот реагира премногу бавно, процесот може да биде болен.
На децата честопати им помага кога родителите нежно им ја масираат болната област. Германските педијатри велат дека на некои деца, исто така, им помагаат и студени облоги.
Но, ако болката трае подолго од две недели во континуитет, родителите треба да го однесат детето на лекар.
Истото важи и ако болката не се смирува во текот на денот или ако е поврзана со оток или црвенкасти дамки. Ова имено можат да бидат симптоми на фрактура или детски артритис.
Децата имаат најмалку два периоди на забрзан раст, од четвртата до седмата година и пред крајот на пубертетот
Кај некои деца постои уште еден период помеѓу двата наведени, но тоа е многу индивидуално. Во овие периоди скелетниот систем, благодарение на симултаниот раст на повеќе долги коски, резултира со истегнување на меките ткива. Затоа често болките од растењето му се припишуваат на пребрзото растење и растегнување на фасции, лигаменти и „замрзнато“ рамо, односно неспособност за следење на брзиот раст на скелетот.
Болките при растењето понекогаш се резултат на напорите на мускулите да ги стабилизираат лабавите и нестабилни зглобови кај хипермобилни деца во моментот кога за време на брзиот раст ќе се „раштима“ координацијата на движења.
Ортопедите им советуваат на родителите пред да заклучат дека нивното дете страда од „растечки“ болки, да се консултираат со лекар, кој ќе направи анамнеза, а по потреба и други дијагностички методи, како што се ултразвучно скенирање или магнетна резонанца. Целта е да се исклучат сите други потенцијални причини.
Децата кои чувствуваат болки при растењето можат да се занимаваат со сите физички активности ако истите не влијаат на зголемување на болките
Лекарите се согласуваат со тоа дека е секогаш поголема штета ако детето не се занимава со физичка активност, отколку штетата која може да произлезе од евентуални последици од активноста. Пожелни се сите видови на движење, од игри, прошетки или организирана рекреација.
