КАКО ДА ЗНАЕТЕ ДЕКА СЕ БОРИТЕ СО АНКСИОЗНОСТ? Лекарите велат дека може да ја препознаете по овие физички симптоми

Многумина од нас искусиле чувство на вознемиреност, било да е тоа поради важни испити, ненадејни лоши вести или лош прв состанок. За луѓето кои страдаат од анксиозно нарушување, овие чувства може да прераснат во повторувачки мисли или грижи кои влијаат на секојдневниот живот.

Од Американското здружение на психолози велат дека анксиозноста може да се манифестира и со физички симптоми.

Д-р Саи Ачутан, психијатар од Велика Британија вели дека повеќето од овие симптоми се предизвикани од прекумерно производство на хормони на стрес, кои вклучуваат кортизол, адреналин, норадреналин и вазопресин. Овие хормони ја активираат состојбата на телото на подготвеност за борба и бегство, поради што доаѓа до забрзан пулс, потење и забрзано дишење.

Лекарите објаснуваат кои се најчестите физички симптоми на анксиозност и објаснуваат што ги предизвикува.

  • Главоболки

Мигрената и хроничните секојдневни главоболки се чести кај луѓето кои страдаат од анксиозно нарушување, велат од Здружението за анксиозност и депресија на САД. Најчеста форма на главоболка е таканаречената тензиска главоболка, кога поединецот се чувствува како околу главата цврсто да му е врзана лента, вели д-р Ачутан.

Главоболките може да предизвикаат ослободување на хормони на стрес, што ги стеснува крвните садови во мозокот, објаснува д-р Ануп Метју, главен психијатар во британската клиника Cantourage.

Сепак, понекогаш е тешко да се препознае што дошло прво: анксиозноста или главоболката.

“Главоболките можат да бидат дел од симптомите на анксиозност, но главоболките може да доведат и до анксиозност“, вели д-р Ачутан.

  • Кардиоваскуларни симптоми

Луѓето кои страдаат од анксиозност често наведуваат дека имаат кардиоваскуларни симптоми како што се стегање во градите или срцебиење. Тоа е затоа што хормоните на стрес предизвикуваат стеснување на крвните садови, што предизвикува висок крвен притисок и забрзан пулс, вели д-р Метју.

Анксиозните нарушувања исто така се поврзуваат со намалена функција на вагусот, нерв кој ги пренесува информациите помеѓу мозокот и внатрешните органи, како и намалена варијација на пулсот, се наведува во една студија од 2014 година објавена во списанието Frontiers in Psychiatry. Вагусот игра клучна улога во регулирањето на активноста на срцето: ако не функционира правилно, срцето не се стега ефикасно. Ниската варијација на пулсот значи дека поединецот слабо се носи со стресорите.

  • Дигестивни симптоми

Кога сме анксиозни, во нашиот дигестивен систем навлегуваат повеќе хормони на стрес, вели д-р Ачутан. Ова доведува до дигестивни проблеми како што се надуеност, болки во стомакот, мачнина и запек.

Поврзаноста помеѓу анксиозноста и висцералната хиперсензитивност (низок праг на толеранција на болка во внатрешните органи) може да биде предизвикана од комбинација на генетски фактори и раните животни искуства, објавено е во 2017 година во списанието Frontiers in Systems Neuroscience. Раното детство е од витално значење за развојот на мозочните мрежи кои го регулираат стресот и болката.

Ако поединецот со генетска предиспозиција искуси трауматски настани во раниот период од животот, на пример насилство, нивните мрежи може да се развијат на начин што ги зголемува чувствата на болка и анксиозност во зрелоста.

Хормоните на стресот исто така можат да го нарушат балансот на бактериите во дигестивниот тракт, предизвикувајќи воспаленија и други дигестивни нарушувања, вели д-р Метју. Студија објавена во 2021 година во списанието Clinical Psychology Review покажала дека луѓето со анксиозно растројство во дигестивниот тракт имаат повеќе бактерии кои предизвикуваат воспаление, а помалку од оние корисните.

  • Лош имунитет

Кортизолот, хормон кој поинтензивно се ослободува за време на периоди на анксиозност, може да влијае на имуниот систем попречувајќи го производството на бели крвни зрнца кои се борат против инфекциите, вели д-р Ачутан. “Ослободувањето на кортизол во подолг временски период доведува до зголемени шанси за инфекција“, додава тој.

 

  • Проблеми со дишењето и вртоглавица

Забрзано, плитко дишење и вртоглавица се чести симптоми на анксиозност, вели Ангел Енрике, клинички психолог.

“Анксиозност чувствуваме кога очекуваме или предвидуваме дека нешто лошо ќе се случи, а нашето тело реагира за да ни помогне да се справиме со интензивна или стресна ситуација“, објаснува тој. “Тоа предизвикува активирање на на состојба на подготвеност на борба или бегање, а телото ќе реагира со забрзување на дишењето за нашите бели дробови да добијат повеќе кислород, во случај да мораме да избегаме“.

Сепак, поради таквата реакција луѓето може да се чувствуваат како да им снемува воздух, што доведува до уште поголема анксиозност или паника, додава д-р Енрике.

Забрзаното дишење може да предизвика и вртоглавица.

“Кога сме анксиозни, почнуваме да дишеме брзо и длабоко“, вели д-р Енрике. “Ова доведува до намалување на нивото на јаглерод диоксид во крвта, што предизвикува мачнина, вртоглавица или пецкање во рацете или стапалата“.