КАКО ДА СЕ ЗАШТИТИТЕ: Еден тип на грип моментално доминира кај нас – кои се симптомите?

Грипот е сезонска болест чие доаѓање секоја година го очекуваме со доаѓањето на студените денови и со подолгиот престој во затворени простори.

Грипот е акутна инфекција на системот за дишење, предизвикана од вирусот на грип. Инкубацијата изнесува 1-4 дена. Од останатите вообичаени вирусни инфекции на дишните патишта од кои најчести се настинките, грипот се разликува по нагло почнување и развој на симптомите на болеста (во рок од 3 до 6 часа). Се карактеризира со висока температура (38 степени и повисока), главоболка и општа малаксалост. Подоцна следат симптоми на течење на носот, болка во грлото и кашлица, кои во повеќето случаи спонтано поминуваат во период од седум дена. Кашлицата може да потрае и откако сите останати симптоми ќе престанат. Кај децата заедно со наведените симптоми може да се појави и мачнина, повраќање и течна столица. Додека од настинка луѓето заболуваат и по неколку пати годишно, грипот е сезонска болест од која најчесто се заболува еднаш во годината (есен-зима). Грипот е и многу опасна болест која може да предизвика и по живот опасни компликации, особено кај повозрасните лица или хронични болни.

Вирусот на грип се уште е непредвидлив за науката. Се разликуваат три типа на вирусот на грип: А, Б и Ц. Епидемиите на сезонски грип кои се јавуваат секоја година најчесто се предизвикани од вирусот тип А, а поретко од тип Б кој има и понизок епидемиски потенцијал.

Според последните извештаи на Институтот за јавно здравје, односно вирусолошкиот рутински надзор во земјава циркулира инфлуенца А, иако е евидентиран и случај на инфлуенца Б.

“Во текот на 50-та недела од 2022 година (12-18.12.2022), во земјава се пријавени 111 случаи на групни пријави за заболени од грип/ заболувања слични на грип, 19,4% повеќе во споредба со претходната недела. Во текот на 50-та извештајна недела, во вирусолошката лабораторија на ИЈЗ РСМ, пристигнаа 286 материјали од рутинскиот надзор за лабораториско тестирање, паралелно тестирани за грип и КОВИД-19. Притоа, детектирани се 8 (2,6%) позитивни случаи, сите Influenza A несубтипизирани. Пријавената инциденца е под неделната граница на сезонската активност на вирусот на грип, односно сѐ уште не е достигнат прагот на влез во сезоната на грип“, објаснуваат од Институтот. 

Од новозаболените, 49 лица се на возраст од 15-64 години, 31 се деца на возраст од 0-4 години, 27 се деца на возраст од 5-14 години и 4 се лица на возраст над 65 години. Највисока инциденца се регистрира кај децата на возраст од 0-4 години. Најголем број заболени се од Дебар, па следат Тетово, Гостивар, Скопје…

Дистрибуција на случаите од сезонски грип/ заболувања слични на грип по месеци

 • октомври – 62 случаи или 15,3%

• ноември – 82 случаи или 20,2%

• декември – 262 случаи или 64,5%

Во досегашниот тек на сезоната на грип, регистрирани се две починати лица асоцирани со грип, од Скопје и Штип, двете од возрасната група од 15-64 години, со регистрирани коморбидитети и невакцинирани со вакцина против сезонски грип.

Како се заболува од грип?

Основниот пат на пренесување на грипот е преку капков пат. Вирусот се излачува со кашлање, кивање и зборување. Затворените простори се особено погодни за негово ширење. Преносот е возможен преку директен или индиректен контакт (со раце, преку предмети и сл.) кога капките или секретите од носот и грлото стигнуваат до раце или други површини и ако ја допираме устата, очите или носот со нечисти раце.

Возрасно лице е заразно три до пет дена од почетокот на болеста, а децата до седум дена. Ретко, болниот може да биде заразен и подолго време, до две недели. Важно е да се напомене дека болниот може да биде заразен и еден ден пред почетокот на симптомите на болеста.

Лекувањето на грипот се состои од мирување, звнесување доволно течности, земање лекови против температура и кашлица, а кај постарите лица или хронични болни доколку се појават компликации од болеста задолжителен е и лекарски преглед.