Некогаш покрај многуте муабети за болестите, нејзините причинители, ризиците и можните компликации често се заборава јасно и едноставно да им се објасни на жените како се користи некој лек кој за време на прегледот е препишан. Користењето стручна терминологија која пациентките често и во потполност не ја разбираат за резултат има неправилно користење на лекот.
Можеби звучи смешно и неверојатно, но затоа имало случаи кога жените ги голтале вагиналетите бидејќи гинекологот не им објаснил како се користат. Додуша, тие не го ни прашале, а сето она што се подразбира како правило и се случува да не го направиме како што треба.
Совети за правилно користење на вагиналетите:
- Пред употреба да се прочита упатството за употреба на лекот и да се провери рокот на траење;
- Вагиналетите се ставаат навечер пред спиење кога ќе се заврши со туширањето, облекувањето пижами и миењето заби, односно кога повеќе нема да имате потреба да станувате од кревет;
- Отворете ја вагиналетата и извадете ја од пакувањето;
- Нема потреба да се користат ракавици, доволно е добро да се измијат рацете пред и по ставањето на вагиналетата;
- Потребно е вагиналетата да се стави длабоко во вагината. Најдобро ќе го направите тоа ако ја ставите во лежечка положба;
- Некогаш е полесно ставањето ако вагиналетата ја натопите со вода;
- Треба да се знае дека после користењето на некои вагиналети секретот се зголемува и излегува повеќе течност од вагината, па треба да се користи влошка.
- После ставањето на вагиналетата не би требало да имате сексуални односи;
- Ако почувствувате чешање, печење или крвавење по ставањето на вагиналетата треба да престанете со терапијата и да го известите вашиот гинеколог;
- Вагиналетата се раствора т.е. топи во вашата вагина.
