Како реагира бебето во стомакот кога мајката пуши

Истражувачите ги споредија снимките од ултразвук на бебиња чии мајки пушеле за време на бременоста и оние кои не пушеле при што дојдоа до интересни и загрижувачки резултати

Истражувачите од Универзитетот во Ланкастер објавија 4-Д снимки од ултразвук со движења на бебиња во моментот кога мајките го вдишуваат чадот од цигарите, а резултатите беа објавени во магазинот „Acta Paediatrica“.

За време на студијата, истражувачите проучувале 80 снимки од ултразвук на 20 бебиња, забележани помеѓу 24 и 36 недели од бременоста. Од 20 случаи, 16 бебиња имале мајки кои не пушеле за време на бременоста, додека четири бебиња имале мајки кои пушеле (во просек околу 14 цигари на ден).

Резултатите покажаа дека бебињата чии мајки вдишувале чад од цигари – ги покривале лицата и ја движеле устата

Според студијата, бебињата чии мајки се пушачи, имале повисока стапка на движења со устата отколку што е вообичаено во тој период од бременоста. Таквото однесување би можело да укажува на тоа дека нервниот систем не се развил во иста мера како кај бебињата кои не биле изложени на пушење.

Истражувачите од Универзитетот во Ланкастер објавија 4-Д снимки од ултразвук со движења на бебиња во моментот кога мајките го вдишуваат чадот од цигарите

„Овие резултати укажуваат на тоа дека изложеноста на никотин има поголемо влијание врз развојот на фетусот отколку што има изложеноста на стрес и депресија“, вели авторот на студијата, д-р Надја Рајсланд, додавајќи дека технологијата им овозможила да го видат она што досега било скриено, откривајќи како пушењето влијае на развојот на фетусот на начин за кој не сме биле свесни.

Треба да се напомене дека сите 20 бебиња биле клинички проценети на раѓање и сите бебиња се родиле здрави, но д-р Рајсланд смета дека се потребни повеќе истражувања на оваа тема за резултатите да бидат уште поконкретни.