Американската актерка Марша Крос од популарната серија „Очајни домаќинки“ неодамна на Инстаграм откри дека се бори со рак, објаснувајќи дека ја изгубила косата како резултат на болеста. „Благодарна сум и среќна што сум жива, но тажно е што ми падна косата“, напиша Крос, која подоцна објави дека се соочила со карцином на анусот.
Веќе наредниот ден ги утеши вознемирените фанови, пишувајќи: „Сега се е добро, зад мене е тешко патување, но сега сум здрава, среќна, поприсутна и поблагодарна од кога било. Ви благодарам од срце за вашата поддршка и љубов“.
Симптомите се мешаат со хемороиди
Рак на анусот се јавува на аналниот канал (кратка цевка каде столицата излегува од цревата). Од рак на анусот почесто заболуваат жени и лица на возраст над 60 години. Ризик за развој на болеста имаат лица заразени со хуман папилома вирус (HPV) или ХИВ, пушачи и имунокомпромитирани лица.
Симптоми
Во некои случаи не постојат симптоми на рак на анусот, а лесното крвавење кое обично е првиот знак на болеста се толкува како знак дека лицето има хемороиди. Освен малото крвавење постојат уште неколку симптоми кои можат да укажуваат на рак на анусот, според Американското здружение за рак:
- Ректално крвавење;
- Ректално чешање;
- Израсток на аналниот отвор;
- Болка или чувство на исполнетост во аналното подрачје;
- Промени во празнењето на цревата;
- Исцедок од аналното подрачје;
- Отечени лимфни јазли во областа на аналниот дел.
Треба да се напомене дека симптомите главно се предизвикани од бенигни неканцерогени појави како што се хемороиди, анални пукнатини или анални брадавици. Затоа не треба да се вознемирувате, бидејќи овој вид на рак е многу редок, но и хемороидите треба да се лекуваат, па затоа треба да се консултирате со лекар за да ја дознаете вистинската причина за тегобите и да почнете со терапија, Како и со повеќето други видови на рак, доколку се открие на време или во рана фаза, стапката на преживување е многу повисока.
