Настинката е вирусна инфекција на горните дишни патишта, односно носот и грлото. Генерално, станува збор за безопасно заболување, кое го предизвикуваат повеќе од 200 вируси, а кои една возрасна личност ги добива два до три пати годишно.
Кашлицата е една од најчестите симптоми на сезонските болести, а кај настинките може да потрае и до две недели. Доколку сте пушач, секојдневно сте изложени на чад од цигарите или имате ослабен имунитет, кашлањето може да потрае и подолго од тој временски период.
За настинка нема лек, а во овој случај не помагаат ниту антибиотиците и вакцините. Одморот и внесувањето на доволно течности е најдоброто нешто што можете да го направите за вашиот организам кога сте настинати. Повеќето луѓе од настинка заздравуваат после седум до десет дена, велат докторите.
Зацрвенето, воспалено грло е симптом кој трае првите ден-два од добивањето на настинката. Лесната главоболка, болки во телото и благо покачена телесна температура траат неколку дена
Заморот може да се задржи првата недела или дури десет дена, а најдолго трае затнатиот нос и кашлањето – до две недели.
За време на настинката, текстурата и бојата на исцедокот од нос може да се менуваат, но тоа не е причина за паника. Јавете се на доктор доколку вашите симптоми траат подолго од десет дена, доколку станува збор за невообичаени и сериозни симптоми, и доколку имате температура повисока од 38 степени.
