Помина повеќе од една година од појавата на новиот коронавирус и болеста КОВИД-19, се уште откриваме нови работи за оваа инфекција. Новите мутации предизвикуваат дополнителна загриженост, а листата на симптоми сега е многу подолга отколку на почетокот на пандемијата.
Освен тоа, коронавирусот не се манифестира кај секого исто. Некои заболени имаат тешки симптоми, некои благи, а некои пак се асимптоматски носители, односно не покажуваат никакви симптоми на болеста.
КЛАСИЧНИ СИМПТОМИ НА КОВИД-19
Според медицинските насоки, најчести симптоми, кои се сметаат за класични знаци на болеста се: покачена телесна температура, кашлица и воспалено грло. Покрај тоа, еден од најкарактеристичните симптоми на КОВИД-19 е губењето на осетот за мирис и вкус, кој се појавува кај речиси 60 проценти од инфицираните лица.
Кај повеќето пациенти, коронавирусот почнува како респираторна инфекција поради што, заболеното лице на почетокот може да искуси симптоми слични на грип или алергија. Температурата која се јавува кај болните од КОВИД-19 главно е помеѓу 37,5 до 39 степени, а вообичаено е проследена со сува кашлица. Кај ковид-пациентите температурата може да потрае со денови, како и воспалението на грло.
Доколку имате било кој од овие симптоми во период од три и повеќе денови или мислите дека сте биле изложени на вирусот, би било добро да се тестирате на коронавирус.
НЕОБИЧНИ СИМПТОМИ НА КОВИД-19
Освен овие класични симптоми, кај лицата кои ќе се инфицираат со коронавирусот, може да се појават необични симптоми како воспаленија во целото тело. Кога вирусот ќе ги нападне мускулните влакна, може да се јават и болки во мускулите и телото, воспаление на зглобовите, мачнина, повраќање, мозочна магла и збунетост, хроничен замор и исцрпеност.
Некои пациенти пријавиле и осип, промени на прстите на нозете, конјуктивитис, опаѓање на косата, како и зуење во ушите како симптоми на новиот коронавирус. Покрај тоа, кај некои пациенти се појавуваат и крвни згрутчувања кои подоцна може да предизвикаат дополнителни проблеми.
КОГА ТРЕБА ДА СЕ ЈАВИТЕ НА ЛЕКАР?
Кај лицата кои имаат благи симптоми, опоравувањето од коронавирусот обично трае помеѓу 10 и 14 дена. Но, пациентите кои имаат потешка клиничка слика, потребна им е медицинска помош.
Треба да се нагласи дека некои симптоми се знак дека ви не потребна итна лекарска помош. Тие симптоми се недостаток на воздух, сини усни и лице, болки во градите, стегање околу срцето, заситеноста со кислород, како и хронична температура која таре помеѓу пет и 10 дена.
