Кој спаѓа во ризична група за херпес зостер, вирусот кој ги полни ординациите

Првите симптоми на херпес зостер може да бидат жарење, чешање, пецкање или екстремна чувствителност на еден дел од кожата, кој обично се наоѓа на една страна од телото. Овие симптоми може да бидат присутни неколку дена пред да се појави црвенило на кожата. Исто така, покачената телесна температура и главоболка може да бидат дел од клиничката слика

Херпес зостер претставува вирусна болест, која се карактеризира со болен осип на кожата со плускавци во локализирана област. Обично осипот се јавува во една, широка лента или на левата или десната страна на телото или на лицето. Два до четири дена пред да дојде до појава на осип, може да има пецкање или локална болка. Кај лица со ослабен имунолошки систем, осипот може да се појави и пошироко. Доколку стаса до окото, можни се неповратни последици по видот.

Херпес зостер е предизвикан од varicella-zoster вирус (истиот вирус кој предизвикува овчи сипаници), кој останал во параспиналните ганглии по инфекцијата со варичела.

Секој кој прележал овчи сипаница подоцна може да има херпес зостер. Статистичките податоци покажуваат дека околу 20 % од луѓето кои прележале овчи сипаници во текот на животот ќе имаат херпес зостер. Повеќето луѓе го добиваат само еднаш во својот живот.

  • Херпес зостер се карактеризира со осип на мал дел од кожата, пропратен со болка, кој личи на осипот што се јавува при овчи сипаници;
  • Обично се јавува на едната страна од телото;
  • Болката може да продолжи со недели или месеци откако осипот ќе исчезне. Ова е познато како постхерпетична невралгија и е почесто кај повозрасните пациенти;
  • Вирусот може да се пренесе преку директен контакт со кожниот осип на заболени лица;
  • Херпес зостер е почест кај лица со послаб имунитет.

Дијагнозата најчесто се поставува со дерматолошки преглед. Врз основа на проценката на дерматологот, течност од пликовите може да се прати на специјални лабораториски испитувања

Која е причината за херпес зостер?

Не е сосема јасно кои фактори доведуваат до реактивирање на вирусот од состојба на мирување. Минливата ослабеност на имунолошкиот систем може да предизвика вирусот да се размножува и да се шири преку нервите до површината на кожата. Болеста, траумата и стресот, исто така, може да доведат до појава на болеста.

Секој кој прележал овчи сипаница подоцна може да има херпес зостер

Кои се симптомите на херпес зостер?

Првите симптоми на херпес зостер може да бидат жарење, чешање, пецкање или екстремна чувствителност на еден дел од кожата, кој обично се наоѓа на една страна од телото. Овие симптоми може да бидат присутни неколку дена пред да се појави црвенило на кожата. Исто така, покачената телесна температура и главоболка може да бидат дел од клиничката слика. Многу брзо, од постоечкото црвенило се создаваат групирани пликови, кои траат две до три недели. Болката, обично многу изразена, е една од главните карактеристики на оваа болест. Многу ретко, херпес зостер може да се манифестира со болка без присустни пликови или пликови без болка.

Дијагнозата најчесто се поставува со дерматолошки преглед. Врз основа на проценката на дерматологот, течност од пликовите може да се прати на специјални лабораториски испитувања.