КОРОНАТА ПОВТОРНО СЕ ШИРИ ВО КИНА: Што вели СЗО за новите варијанти на вирусот

Во Кина засега не е пронајдена нова варијанта на коронавирусот, покажуваат податоците кои вчера ги објави Светската здравствена организација (СЗО), со тоа смирувајќи дел од загриженоста околу заразата која брзо се прошири во Кина откако Пекинг ја укина својот “зеро ковид“ пристап на пандемијата.

Мнозинството жители на Кина, 97,5 отсто од нив, се заразени со подваријантите на омикрон BA.5.2 и BF.7, објави СЗО. Тие податоци се засноваат на анализи на повеќе од 2.000 геноми што ги спровел Кинескиот центар за контрола и превенција на болести.

СЗО соопшти дека овие податоци се во склад со секвенционирањето на геномите на патниците од Кина што другите земји го испратиле во светската база на податоци и дека не е забележана нова мутација или мутација на познати соеви во јавно достапните информации за секвенционирање.

СЗО ги објави податоците доставени од кинескиот Центар еден ден откако неговите претставници се сретнаа со кинеските научници, во време кога остатокот од светот се сомнева во точноста на кинеските извештаи за ширење на инфекцијата што ги преполни кинеските болници.

Здравствените власти ширум светот, во меѓувреме, се мачат со утврдување на точниот степен на епидемијата во Кина и начинот како да го запрат нејзиното ширење. Сè повеќе земји воведуваат мерки како што се тестирање на патниците кои пристигнуваат од Кина, што Пекинг го критикуваше.

Шефот на СЗО, Тедрос Аданом Гебрејесус,изјави дека организацијата продолжува да бара од Кина побрзи и поредовни податоци за хоспитализирањата и смртните случаи.