Скопје, 27 март, 2020 – Во текот на изминатиот ден во земјава пријавени се 24 нови случаи на заразени со коронавирус во шест градови во земјава и тоа, 15 лица во Скопје, 4 лица во Куманово, две во Дебар, и по едно во Штип, во Охрид и во Тетово. Заклучно со оваа бројка, пријавени во земјава се 201 болен од КОВИД-19.
Најголем дел од регистрираните случаи се на возраст од 50-59 години, а во однос на дистрибуцијата по пол, 10 машки и 14 се женски. Од нив, хоспитализирано е едно лице, а останатите се на домашно лекување. Кај петмина нови болни од КОВИД-19, регистрирано е присуство на коморбидитети. Вкупно 16 лица имале контакт со веќе потврден случај на КОВИД-19 во земјава.
Тестирани се вкупно 340 материјали во лабораторијата за вирусологија и молекуларна дијагностика при Институтот за јавно здравје (240) и во приватната лабораторија Жан Митрев Клиник (100). Позитивни се 24 или 7,1% од тестираните, од нив 23 се потврдени во лабораторијата при ИЈЗ, додека еден е потврден во приватната лабораторија Жан Митрев Клиник.
По градови состојбата со коронавирусот е:
- Скопје -123
- Дебар – 43
- Куманово – 15
- Штип – 8
- Велес – 3
- Охрид – 3
- Кавадарци – 2
- Прилеп – 2
- Тетово – 1
- Гостивар – 1
Највисока кумулативна инциденца на 100.000 жители се регистрира во Дебар со 154,9 заболени на 100.000 жители, а во Скопје инциденцата е 19,9 на 100.00 жители, додека во Штип инциденцата на 100.000 жители е 15,2.
Во однос на дистрибуцијата по пол, регистрирани се 100 лица од машки пол и 101 лица од женски пол или сооднос машки – женски 1:1. Специфичниот морбидитет по пол кај машките е 9,6/100.000 жители, додека кај женските изнесува 9,8/100.000 жители.
Возраста на заболените се движи од 2 до 91 години (просек – 43,5 години). Најголем број на заболени се на возраст од 50-59 години – 46 (22,9%) каде е регистрирана и највисока специфична инциденца од 16,5/100.000 жители и 30-39 години – 44 (21,9%).
Од досега пријавените случаи, 44 или 21,9% се/биле хоспитализирани во текот на болеста, а 157 случаи се на домашно лекување и во домашна изолација, асимптоматски или со полесна клиничка слика. Во однос на симптомите кои се пријавени кај заболените лица, најчесто се регистрирани кашлица (68,3%), температура (64,0%), слабост (29,5%), главоболка (25,9%), болка во грло (21,6%) и треска (19,4%), а 62 лица се без изразени симптоми.
Во однос на коморбидитети, кај 43 лица се присутни хронична/и здравствени состојби, од кои 30 лица имаат кардиоваскуларна болест, 7 лица се со хронична белодробна болест, 5 со дијабет, 4 со хронична бубрежна болест и 7 со други хронични болести.
