Скопје, 19 март, 2020 – До утрово, во 08:00 часот, во земјава се евидентирани вкупно 42 случаи на лица заразени до коронавирусот. Во текот на вчерашниот ден регистрирани беа 11 нови случаи и според министерот за здравство Венко Филипче, состојбата на сите пациенти е стабилна, а двајца од нив имаат средно изразена пневмонија.
Денес, ќе бидат соопштени и резултатите од вчера направените 22 тестирања.
Од вчера, започнат е и процес за ран скрининг на заболени од коронавирус во неколку општини.
„Раното откривање, скрининзите по епидемиолошки индикации, како што веќе почнавме да ги правиме во Дебар, а сега и во околината во Струга, некои населени места во Скопје и во други градови, согласно податоците кои ги имаат епидемиолозите, сметам дека е многу важно за да што порано се откријат случаите и за да не го оптоварат здравствениот систем, кое понатаму може да предизвика проблеми и компликации во лекувањето и неможност да се справуваме со овој проблем“, истакна министерот Филипче.
