„Кога осетив болки во градите, докторите кажаа дека треба да одам за Скопје, а во тоа време во Скопје немаше доктор којшто може да ме оперира од срце, па ме пратија да одам во Бугарија. Слушнав за доктор Жан Митрев и решив да почекам да дојде тука и кога ќе ја отвори клиниката таму да се оперирам. Кога ме прегледа доктор Жан Митрев рече дека треба да ми стават бајпас на срцето и ми направија три бајпаса. Не се надевав дека токму мојата операција на срцето ќе испише историја. Се гледаме на 30-тиот роденден на 1 март”, вели Коста Шапков, првиот пациент на клиничката болница „Жан Митрев“.
Шапков тогаш 55-годишен машинобравар од Кочани повеќе од 4 часа поминува во операционата сала на тогашната специјална болница по хируршки болести „Филип Втори“, а денес „Жан Митрев Клиник“, со чијашто операција и официјално започна со работа оваа приватна болница на 1 март 2000 година.
„Тоа беше мојата најтешка операција. Операција на духовното срце на Македонија”, изјави доктор Митрев во неколку наврати по успешно спроведената операција на Коста Шапков, којшто денес е пензионер, има 77 години и е најстариот пациент на доктор Жан Митрев.
Коста во име на сите пациенти на „Жан Митрев Клиник“ се заблагодарува на доктор Жан Митрев и неговиот тим, истакнувајќи дека во изминатите години постоење и делување на клиниката имало и други многу посериозни операции коишто биле успешно спроведени спасувајќи илјадници човечки животи благодарение токму на докторот Митрев.
