Норвешки експерти откриле дека жените кои страдале од мозочен удар имале значително помала коскена густина од другите здрави жени. Како последица на овие резултати тие почнале да ја истражуваат и можната врска меѓу остеопорозата и атеросклерозата- болест во која маснотиите, калциумот и сврзното ткиво се акумулираат на артериските ѕидови и со тоа го попречуваат протокот на крв. Атеросклерозата е честа причина за мозочен удар и други васкуларни заболувања.
Истражувачите на Универзитетот во Тромсо испитале 6.000 луѓе и заклучиле дека постои врска помеѓу густината на коските и видот на атеросклерозните промени. Жените кои ги имаат овие промени се изложени на поголем ризик од фрактури на коските.
„Во многу случаи, едно лице може да се развие остеопороза и да страда од срцев удар поради сосема различни причини. Но, можеби постои поврзаност помеѓу двете болести. Податоци од неколку истражувачки групи укажуваат дека можната биолошка врска го вклучува остеопротегеринот“, вели професорката Лоне Јоргенсен, лидер на истражувањето.
„Губењето на коскеното ткиво е поврзано со повисокото ниво на ОПГ кај жени кои се во менопауза, а повисоките нивоа на ОПГ, исто така, го предвидуваат развојот на атеросклерозата”, заклучува Јоргенсен и додава дека се надева оти нивното откритие ќе помогне во развојот на методи за спречување на сериозна атеросклероза и остеопороза.
Остеопорозата е болест која се карактеризира со намалена коскена густина поради прекумерно губење на калциумот и коскеното ткиво, при што коските стануваат порозни. Таквите коски се чувствителни на различни физички стресови. Фрактури на пршлените, феморалните коски и подлактицата се чести и при минимална траума.
Се проценува дека околу 75 милиони луѓе ширум светот страдаат од остеопороза. Ризичната популација се жените во менопауза, мажите постари од 50 години, како и луѓето кои долгорочно земаат кортикостероиди.
