Глаукомот е хронична и прогресивна болест на очниот нерв која резултира со пропаѓање на видното поле и губење на видната функција. Се смета за главна причина за слепило, доколку не се лекува, а според податоците, околу два до пет проценти од населението има глауком. Обично не покажува никакви симптоми, а иако глауком може да се појави кај секого, ризик фактори за негова појава се позитивната семејна наследност, возраст над 40 години, висока краткодивност (миопија), дијабетес и висок крвен притисок (хипертензија). Токму овие две болести се сметаат, според нова студија, како предиктори на раната фаза на глаукомот.
Имено, новото истражување, објавено во списанието Clinical Ophthalmology на UT Southwestern Medical Center, открило дека раниот развој на дијабетес тип 2 или високиот крвен притисок може да укаже на ран почеток на глауком бидејќи, меѓу другото, овие состојби влијаат на крвните садови на оптичкиот нерв и мрежницата.
Иако се потребни повеќе истражувања пред да се извлече каква било причинско-последична врска помеѓу дијабетесот, хипертензијата и глаукомот, на лицата со дијабетес и хипертензија им се советува да го измерат очниот притисок и да направат преглед за оштетување на мрежницата (самата вредност на очниот притисок не е доволна за да се постави дијагноза).
Глаукомот има тенденција да се развива бавно со текот на годините и прво ги зафаќа рабовите на видот (периферен вид). Затоа многу луѓе не сфаќаат дека имаат глауком се додека не се открие за време на рутински очен преглед. Ако забележите какви било симптоми, кои може да вклучуваат заматен вид или кругови во боја на виножито околу силни светла, најдобро е веднаш да посетите очен лекар.
СИМПТОМИ НА ГЛАУКОМ
Иако глаукомот во рана фаза обично не покажува симптоми, штом болеста се развие, проследена е со овие знаци:
– интензивна болка во очите
– мачнина
– повраќање
– црвенило на очите
– главоболка
– чувствителност на очите
– прстени околу светлото
– заматен вид
МОЖЕ ЛИ ДА СЕ ЛЕКУВА ГЛАУКОМОТ?
Глаукомот мора да се лекува, но не е возможно да се поништи каква било штета што веќе се појавила на окото. Колку подоцна се дијагностицира болеста, толку помалку може да се зачува она што останало од видот.
Постојат три вида на лекување: капки за очи, ласерско лекување и хируршка интервенција. Капките за очи помагаат да се намали притисокот на очите и да им се овозможи повеќе одмор, додека ласерскиот третман може да помогне да се отворат блокираните дренажни цевки или да се намали производството на течност во очите предизвикано од глауком.
Операцијата се советува за за да се подобри дренажата на течности за да се намали притисокот врз окото и за да се обиде да го намали ширењето на глаукомот.
