“Кога луѓето ме прашуваат дали постои начин да се спречи развојот на малигните заболувања, јас секогаш одговарам дека најдобар превентивен лек е доброто здравје“, истакнува онкологот д-р Лиза Ричардсон и додава дека пациентите мора да знаат дека е неопходно да се носат здрави одлуки со цел да се заштити нивното здравје. Ова е листа на пет изненадувачки фактори кои можат да влијаат на развојот на рак.
ОБЕЗНОСТ
Обезноста или прекумерната телесна тежина се дефинира како прекумерна количина на маснотии во телото која е опасна за здравјето. Обезноста се јавува кога, во подолг временски период, едно лице внесува повеќе калории отколку што троши. Д-р Клифорд Худис, онколог, наведува дека некои од најчестите тумори на дојка, бели дробови, црева и простата се директно поврзани со прекумерната телесна маса.
“Поголемиот дел од Американците се со прекумерна тежина, а тоа ги става во ризична група за развој на болести. Одржувањето здрава телесна тежина може да има големо влијание врз одржувањето на здравјето, но и врз превенцијата“, вели поранешната директорка на Центарот за контрола и превенција на болести, д-р Бренда Фицџералд.
ЛОША ИСХРАНА
Истражувањата покажуваат дека лошата исхрана е директно поврзана со развојот на ракот, а една студија открила дека околу 80.000 нови случаи во Америка се поврзани со лошата исхрана.
“Алкохолот е уште еден придонесувач за развојот на рак, тука е и реткото консумирање на интегрални житарки, млечни производи, овошје и зеленчук, но и голем внес на црвено месо и засладени пијалаци“, објаснува д-р Фанг Џанг. Претходни студии даваат силни докази дека црвеното месо може да биде поврзано со рак на дебелото црево, како и слабото консумирање на интегрални житарки. Но, студијата не го покажала точниот број на нови случаи на рак поврзани со лошата исхрана.
СТРЕС
Има многу истражувања кои го поврзуваат хроничниот стрес и развојот на рак. Неконтролираниот стрес носи бројни здравствени ризици, а срцевите заболувања се на врвот на листата. Ова може да се припише на фактот дека неконтролираниот стрес има погубно влијание врз човечкиот имун систем, кој е главната линија на одбрана од штетните микроорганизми кои го напаѓаат нашето тело. Исто така, имуниот систем е задолжен за контрола на секое необично “однесување“ на клетките во телото, бидејќи тие можат да се претворат во канцерогена форма.
“Хроничниот стрес создава нешто како совршена бура каде што преканцерозните клетки можат слободно да растат“, вели д-р Анкур Парик, директор на одделот за прецизна медицина (Cancer Treatment Centers of America). Ако сте загрижени за нивото на стрес со кое често се соочувате, постојат едноставни техники кои ќе ви помогнат да го контролирате.
НЕДОСТАТОК НА СОН
“Студиите покажаа дека долгорочните проблеми со несоницата може да го зголемат ризикот од развој на неколку видови на рак, рак на дојка, рак на простата и на тироидната жлезда“, објаснува д-р Мајкл Бреус. “Недостатокот на сон може да се поврзе и со поагресивен развој на туморот, а има бројни студии кои покажуваат дека оние кои работат ноќни смени имаат поголем ризик од развој на некоја форма на рак“, додава тој. Докажано е дека недостатокот на сон може да го зголеми ризикот од развој на рак на дебелото црево, желудникот, кожата и белите дробови.
АЛКОХОЛ
На оние кои сакаат да пијат вино можеби не им се допадне оваа вест, но консумирањето алкохол не се смета за безбедно и често претставува ризик по здравјето. Според истражувањата, пиењето алкохол секој ден е поврзано со зголемен ризик од развој на рак на дојка кај жените, објаснува д-р Јирген Рем, научник во институтот за ментално здравје CAMH.
