ЛЕКАРСКО ОБЈАСНУВАЊЕ: Зошто вакцината против КОВИД-19 се става во надлактица?

Мускулите се одлично место за примена на вакцина, оти нивното ткиво содржи битни имуни клетки кои препознаваат антиген, ситен фрагмент од вирусот или бактерии кои се воведуваат со вакцината и стимулира имуна реакција.

Милиони луѓе во последниве неколку месеци ги завратија ракавите за да примат вакцина против КОВИД-19, но зошто наместо ракав, не ги завратија ногавиците од панталоните? И зошто најчесто примаме вакцина во мускулот на надлактицата?

Проф. Либи Ричардс вели дека ова прашање многу често го слуша во последниов период, па ја објаснува ‘науката’ што стои зад него.

Пред се мора да се напомене дека повеќето, но не и сите вакцини, се даваат во мускул. Тоа се нарекува интрамускулна инјекција. Некои меѓу нив, како вакцината против ротавирусот, се даваат орално, а трети се вбризгуваат во поткожното ткиво, како вакцините против сипаници, заушки и рубеола.

Но, зошто мускулот е толку важен и дали е важно местото на убодот?

МУСКУЛНОТО ТКИВО СОДРЖИ ВАЖНИ ИМУНИ КЛЕТКИ

Мускулите се одлично место за примена на вакцина, оти нивното ткиво содржи битни имуни клетки кои препознаваат антиген, ситен фрагмент од вирусот или бактерии кои се воведуваат со вакцината и стимулира имуна реакција.

Во случај со вакцината против ковид, таа не внесува антиген, туку дава упатства за производство на антигени. Имуните клетки во мускулното ткиво собираат антигени и им ги претставуваат на лимфните јазли.

Вбризгувањето вакцина во мускулното ткиво ја одржува вакцината локализирана, овозможувајќи им на имуните клетки да ги алармираат останатите имуни клетки и да отпочнат со работа.

Штом имуните клетки во мускулот ќе ја препознаат вакцината, тие го пренесуваат антигенот во лимфните садови, кои потоа ги транспортираат имуните клетки со антигенот до лимфните јазли.

Лимфните јазли, клучна компонента на нашиот имун систем, содржат повеќе имуни клетки кои го препознаваат антигените од вакцините и започнуваат имунолошки процес на создавање на антитела.

МУСКУЛИТЕ ЈА ОДРЖУВААТ АКТИВНОСТА ЛОКАЛИЗИРАНА

Мускулното ткиво истовремено настојува да ја задржи реакцијата на вакцината локализирана, односно ограничена на одредено место. Затоа, вбризгувањето на вакцината во делтоидниот мускул можеда резултира со локално воспаление или болка на местото на убодот.

Доколку одредени видови вакцина се вбризгуваат во масно ткиво, се зголемуваат шансите за иритација или воспалителна рекација, оти масното ткиво послабо е обезбедно со крв, што резултира и со послаба апсорбција на некои од состојките на вакцината.

Вакцините за кои се потребни додатоци или состојки кои го подобруваат имунолошкиот одговор на антигенот,  мора да се инјектираат во мускулот за да се избегне поголема иритација и воспаление. Овие додатоци делуваат на различни начини за да поттикнат што е можно посилен имунолошки одговор.

Притоа, проф. Ричардс вели дека ставањето на вакцината во рака е попрактично и полесно за луѓето, отколку ставањето во мускул на ногата.