Летото е идеално време: Како да го одвикнете детето од пелени?

Одвикнувањето од пелени е комплексен процес кој бара специфична физичка, емоционална и невролошка зрелост

Одвикнувањето од пелени е важна фаза во животот на секое дете. Вообичаениот почеток на навикнување на нокширче е околу 20 месец, но прифатливи се и значајни отстапувања.

Нема ништо лошо ако дете од една година со гримаси покаже дека ќе изврши голема нужда, а вие го ставите на нокшир и го пофалите за што тоа го направило. На тој начин сте заштедиле и време и пелени, меѓутоа тоа не е вистинското, свесно одвикнување.

Одвикнувањето од пелени е комплексен процес кој бара специфична физичка, емоционална и невролошка зрелост. Основен невролошки одговор на прашањето кога е детето зрело за да развие навика да оди во тоалет е нивото на развој на неговиот централен нервен систем, а тоа значи дека детето оди самостојно, чувствува дека треба да изврши нужда, има доволно развиен говор, или со други зборови, разбира што треба да направи и сака да го исполни она што се очекува од него.

Летото е вистинско време да се одвикнете од пелени. Немојте да се изненадите ако детето, кога ќе изврши нужда, покаже чудење затоа што одеднаш е влажно, бидејќи чувството кога мочка во пелени е сосема поинакво.

Не ги слушајте другите, чии деца прифатиле нокширче на десет месеци или на една година

Веројатно, ќе успеете да го постигнете тоа многу побрзо и полесно со постаро дете, бидејќи тоа разбира што прави – има деца кои воопшто не покажуваат интерес за нокшир, а потоа научуваат се преку ноќ, на две ипол или три годишна возраст.

Одвикнувањето од пелени, секако, треба да се прилагоди на детскиот ритам, а пред се, треба да бидете трпеливи.

Ако сте почнале со одвикнување од пелени во вистинското време, најверојатно ќе успеете да ја постигнете целта за десетина дена

Кога е детето подготвено:

* Ако пелената е сува по неколку часа;

* Голема нужда врши главно во исто време;

* Покажува интерес за веце;

* Му пречат мокри или валкани пелени;

Кога не треба да инсистирате:

* Кога очекувате принова во семејството;

* Кога детето тргнува во градинка;

* Кога менувате кревет, соба или се селите;

* Кога има некои проблеми во семејството.

Како да почнете со одвикнување:

  1. Купете нокшир и ​​ставете го помеѓу играчките. Покажете му на детето со кукла или мече за што служи нокширчето. Или, пак, земете го детето со вас во продавница да избере нокшир – заинтересираноста е првиот знак дека детето е подготвено за одвикнување од пелени;
  2. Ставете го детето облечено на нокшир да се навикне на него и да сфати дека не е ништо на сила;
  3. Нека седне без облека, но дајте му на знаење дека не е важно дали ќе изврши нужда;
  4. Секогаш кога ќе изврши нужда во нокширчето, пофалете го, а ако не успее, немојте да се лутите;
  5. Колку брзо ќе ја усвои навиката за одење во тоалет зависи од неговата зрелост, возраст, темперамент, но и други фактори. Ако сте почнале со одвикнување од пелени во вистинското време, најверојатно ќе успеете да ја постигнете целта за десетина дена.