Мажите кои преку трансфузија примиле крв од жена која била бремена би можеле да бидат изложени на поголем ризик од смрт, покажа најновото истражување, кое го пренесува британски „Телеграф“.
Имено, научниците веруваат дека антителата кои жената ги развива додека е бремена за да го заштити бебето кај мажите би можеле да предизвикаат потенцијално фатални реакции.
Експертите наведуваат дека нивната теза треба дополнително да се истражува, но доколку се покаже како точна, ќе го промени целиот систем на дарување на крв. Само во Велика Британија секоја година има два милиона трансфузии, а пациентите дури не знаат ни кој е полот на нивниот дарител на крв.
Новото истражување потврдило дека машките пациенти кои примиле крв од жена која била бремена, обично страдале од акутна белодробна инсуфициенција предизвикана од трансфузија, која настапува еден до шест часа по трансфузијата, а може да биде и фатална
Д-р Рутгер Миделбург од истражувачкиот центар во Лајден во Холандија вели: „Некои студии покажале дека дури постојат и разлики во физиологијата на црвените крвни клетки помеѓу половите. Алтернативното објаснување може да се бара во разликата во состојбата, односно нивото на железо кај жените и мажите. Напоменувам дека ова и понатаму е само опсервациска студија. Сите податоци што ги имаме се исклучиво од Холандија, а ситуацијата, се разбира, може да биде сосема поинаква кај популации со различно генетско потекло. Се уште нема реална причина за загриженост. На крајот на краиштата, и јас сум маж, а би примил крв од жена која била бремена“, објаснува д-р Миделбург.
Научниците во периодот од 2005 до 2015 година во шест холандски болници ја проучувале стапката на смртност кај 31 118 пациенти, кои преку трансфузија примиле 59 320 единици на крв. Речиси 4 000 од нив, или 13 отсто, умреле откако добиле крв – починал 101 човек откако добил крв од жена која била бремена, а бројот на смртни случаи по трансфузија на крв од машки донатор бил 80. Жените кои никогаш не биле бремени, а дарувале крв, се поврзани со само 78 смртни случаи на 1 000 мажи.
