Постојат неколку начини вашето бебе да стигне од точката А до точката Б или поедноставно до местото кое е безбедно или до полицата со, можеби, вредни работи кои толку многу му го привлекуваат вниманието
Класичен начин
Ова е стандардно ползење, на двете рачиња и ноџиња. Бебенцето можеби ќе биде премногу несигурно на почетокот, но не се сомневајте дека многу брзо ќе биде во состојба на јурење низ просторијата.
Командос
Овој стил е сличен на класичното ползење, освен што стомачето на бебето останува на земја и со испружени рачиња и ноџиња се придвижува нанапред. Добрата страна на ова е што вашиот под секогаш ќе биде чист, што, за жал, не може да се каже и за облеката на бебето.
Наназад
Можеби ќе се изненадите кога ќе видите дека вашето бебе оди наназад или, пак, ползи на страна, а всушност ова воопшто не е толку ретка појава кај бебињата. Не е исклучено нити дека, веројатно, ќе заврши така што ќе го заглави газето под, на пример, креветчето или ќе турне некој предмет. Но сепак, нели најважно е дека бебето се движи.
Движење на газето
Ова е, веројатно, и најслаткиот начин на движење. Не постои само еден начин, туку неколку варијации, всушност се сведува на тоа дека горниот дел од телото е исправен, а бебето се влече на своето газе по просторијата.
Меченце
И овде бебињата се служат со рацете и нозете, само разликата е во тоа дека екстремитетите им се целосно испружени. Како резултат имате бебе кое личи на малите мечиња додека се обидува да прошета низ просторијата.
Тркалање
Важно е да се знае дека некои бебиња едноставно не ползат и тоа не треба да ве загрижува. Некои бебиња се толку добри во тркалањето што не гледаат потреба да научат да ползат. Мора да признаете дека е забавно да се гледа детето како се тркала како топче низ собата за да дојде до играчките.
Совет: Оставете го бебето само да реши кој стил најмногу му одговара, затоа што ниту еден не е исправен или погрешен начин. Единствено што е важно е да се запамти дека од шесттиот до десеттиот месец бебињата се обидуваат самостојно да се движат и секое си има свое темпо на напредување.
