Лекарите и медицинскиот персонал хелиодромот во рамките на Клиничкиот центар, утре во 11 часот, ќе одржат 30 минутен мирен протест, за да го искажат својот револт за се почестите напади врз здравствените работници. Истовремено мирен протест ќе одржат и медицинарите од останатите здравствени установи во земјава, а според организаторите, Асоцијацијата на млади лекари, нема да се наруши процесот на пружање здравствена помош на пациентите. Поддршка на Асоцијацијата, даде и Синдикатот на Клиничкиот центар.
Асоцијацијата на специјализанти и млади лекари, бара итно донесување на Закон за докторска дејност, законско санкционирањето на напад на медицинар, по принципот изедначување на напад на медицинар со напад на полицаец, како и итно и сериозно организирање на служби за обезбедување во секој здравствен објект без исклучок, во обем согласно потребите и прометот на пациенти.
Со еднолично свирење од сирените, и вработените во Итната медицинска помош ќе бидат дел од овој мирен протест, а се со цел да се изнајде соодветно решение за заштита на медицинскиот персонал во земјава. Присуство на протестот е најавен и од Здружението на лекари Албанци, како и од Асоцијацијата на медицински сестри.
Во знак на поддршка, на мирниот собир, најави доаѓање и министерот за здравство Венко Филипче, кој вчера имал координација со министерствата за правда и за внатрешни работи и со претставници од Лекарската комора.
За само девет месеци, во земјава се евидентирани 15 случаи на физички напад на лекари. Законската регулатива, за напад на лекар, предвидува и затворска казна од 10 години.
Последниот насилник кој во минатата недела физички нападна вработени во Градската хируршка клиника „Св. Наум Охридски“ во Скопје, заработи кривична пријава.
