Научници на Универзитетот Кембриџ изработиле виртуелен 3Д модел на тумор, овозможувајќи нов начин на гледање на оваа болест кој ќе го подобри разбирањето и ќе помогне во истражувањето на нов начин на лекување. Примерок од туморот, земен од пациенти, може детално да се прегледа од сите страни и секоја поединечна клетка може да се мапира.
Системот на виртуелна реалност (ВР) овозможува прегледување на туморот на поголем број корисници било каде во светот.
Раководителот на истражувачкиот Институт за рак на Кембриџ, проф. Грег Хенон вели дека никој никогаш не ја прегледал структурата на туморот толку детално и дека ова е нов начин на поглед на ракот.
Иако примерокот од човечкото ткиво бил со големина на значка, во виртуелната лабораторија можел да се зголеми до големина од неколку метри. За да го истражат туморот до најситниот детал, ВР системот овозможил „лет преку клетките„.
Виртуелниот тумор кој го претставиле бил изваден од млечните канали во градите на една жена. Како професорот го вртел моделот, издвоил група на клетки кои ја напуштале главната структура.
„ Овде може да видите како некои клетки од туморот избегале од каналот за млеко. Тоа е можеби моментот кога ракот се шири на околното ткиво и станува многу опасен. Прегледот на туморот во 3Д ни овозможува да го фатиме тој момент„, изјавил професорот.
„Разбирањето како клетките од ракот делуваат взаемно и на здравото ткиво, многу е важно ако сакаме да развиваме нови терапии. Гледајќи на туморите со помош на овој нов систем многу е подинамично од статичната 2Д верзија на која сме навикнати„, истакнува проф. Керен Вусден, како дел од истражувачкиот тим.
