Научниците открија шест различни форми на КОВИД-19 и секоја од нив има свој „посебен кластер на симптоми“

Револуционерно откритие кое, според мислењето на научниците, во голема мерка ќе помогне да се спасат животи на лица заболени од КОВИД-19.

Научниците идентификуваа шест различни видови на КОВИД-19, а до заклучокот дошле анализирајќи ги симптомите на голем број заболени. Ова откритие, како што велат тие, може да биде од огромна помош во спречување на ширењето на заразата, како и да им укаже на лекарите кои пациенти се најмногу изложени на ризик.

Се смета дека различните форми на болеста ја одредуваат нејзината тежина, па така може да се “претпостави“ кому ќе му биде најпотребен респиратор, велат научниците.

Авторите на студијата, предводени од истражувачи од Кралскиот колеџ во Лондон, велат дека овие информации ќе бидат од голема помош при лекувањето на пациентите со КОВИД-19 за време на потенцијалниот втор бран на новиот коронавирус, како и дека на многумина може да им ги спаси животите.

Иако постојаната и упорна кашлица, треската и губењето на мирис обично се истакнуваат како три клучни симптоми на болеста, податоците собрани од околу 1.600 корисници на апликацијата “COVID Symptom Study” во Велика Британија и САД покажуваат дека луѓето може да доживеат широк спектар на различни симптоми.

Тие може да вклучуваат главоболка, болки во мускулите, замор, дијареа, збунетост, губење на апетитот, испрекинат и краток здив и уште многу други.

Истражувачите заклучиле дека во зависност од тоа во која од овие шест групи на симптоми припаѓа пациентот, зависи и брзината на лекување и опоравување, како и колку состојбата на пациентот ќе се влоши.
Еве за кои “видови“ КОВИД-19 станува збор и кои симптоми ги следат:
  • НАЛИК НА ГРИП БЕЗ ТЕМПЕРАТУРА – главоболка, губење на осетот за мирис, болка во мускулите, кашлица, болка во грлото, болка во градите, без температура.
  • НАЛИК НА ГРИП СО ТЕМПЕРАТУРА – главоболка, губење на сетилото за мирис, , кашлица, болки во грлото, засипнатост, треска, губење на апетитот.
  • ГАСТРОИНТЕСТИНАЛЕН – главоболка, губење на мирисот, губење на апетитот, дијареа, болки во грлото, болки во градите, без кашлица.
  • ПОТЕШКА СЛИКА СО ЗАМОР – главоболка, губење на осетот за мирис, кашлица, треска, засипнатост, болка во градите, замор.
  • ПОТЕШКА СЛИКА СО КОНФУЗИЈА – главоболка, губење на мирисот, губење на апетитот, кашлица, треска, засипнатост, болка во грлото, замор, конфузија, болки во мускулите.
  • ПОТЕШКА СЛИКА СО СТОМАЧНИ И РЕСПИРАТОРНИ ТЕГОБИ – главоболка, губење на сетилото за мирис, губење на апетит, кашлица, треска, засипнатост, болка во грлото, замор, болка во градите, збунетост, болки во мускулите, недостаток на здив, дијареа, болки во стомакот.