Австриски научници за прв пат пронашле траги од микропластика во примероци од човечки измет, што укажува дека постои можност таа да е нашироко распространета во ланецот на исхрана на човекот. Научниците тестирале примероци од осум различни студии, кои биле спроведувани во различни земји. Во секој примерок е пронајдена некаква форма на микропластика – со величина од 50 до 500 микрометри.
Микропластиките се мали честички на пластика помали од пет милиметри, кои се создаваат од разни извори, како што се пластичната амбалажа и пластичните ќеси.
Стручњаците, меѓутоа, повикуваат на воздржаност, бидејќи студиите биле мали по обем, а нема значајни докази дека е пронајдена микропластика со потекло од производите кои учесниците во студијата секојдневно ги користеле во својата исхрана. Тимот одговорен за ова откритие повикал на пообемно истражување и пронаоѓање на можните последици по човековото здравје.
„Ова е прва студија од ваков вид која го потврдува она во што долго време се сомневавме, дека пластиката на крајот стигнува до човековата утроба„, изјавил главниот истражувач, д-р Филип Швалб од Медицинскиот факултет во Виена.
Учесниците во студијата биле по потекло од Финска, Италија, Јапонија, Холандија, Полска, Русија, Велика Британија и Австрија, а им било наложено една недела пред тестирањето да водат евиденција за се што јаделе. Според тие податоци, тие биле изложени на храна завиткана во пластика, а поединци јаделе и морски плодови. Во просек пиеле по 750 мл вода од пластични шишиња.
