НАУЧНО ДОКАЖАНО: Кортикостероидите драстично ги зголемуваат шансите за преживување на критично болните од КОВИД-19

Научниците ги обединиле податоците од 121 болница во осум земји за да откријат дека евтините, широко достапни стероиди ја подобруваат веројатноста дека и многу болните пациенти со КОВИД-19 ќе ја преживеат болеста.

Наодите се направени на основ на испитувањето REMAP-CAP и објавени на JAMA како дел од серија од четири написи. Светската здравствена организација оттука ги ажурира своите насоки за лекување на КОВИД-19.

REMAP-CAP е едно од седумте рандомизирани контролни испитувања на кортикостероидите (група на лекови кои го намалуваат воспалението и ја модулираат активноста на имуниот систем) за лекување на КОВИД-19 кај критично болните пациенти. Оваа анализа ги потврдила и зајакнала резултатите од јунското истражување на UK RECOVERY, кое покажа дека еден стероид ја намалува смртноста кај болните со КОВИД-19 за 29 проценти.

“Релативно ретко во медицината ќе најдете лекови чии докази за нивната ефикасност во спасувањето живот се толку доследни. На лицата на вентилатори или респиратори и на интензивна нега секако треда да ми се дадат кортикостероди “, вели водечкиот автор Дерек Ангус од Универзитетот во Питсбург.

Испитувањето на кортикостероидите REMAP-CAP, рандомизирало 403 возрасни пациенти со КОВИД-19. Утврдена е 93 процентна веројатност дека седумдневна интравенска терапија со овие препарати резултира со подобри исходи, а резултатите биле конзистентни за возраста, раста и полот.

“На почетокот на годинава се чувствував речиси безнадежно, знаејќи дека немаме специфични третмани. Беше тоа загрижувачки период. Сепак, за помалку од шест месеци подоцна, во висококвалитетни клинички испитувања, пронајдовме јасни, сигурни докази за тоа како можеме да се носиме со оваа катастрофална болест. Сега имаме повеќе избори на лекување со стероиди“, вели Ентони Гордон, еден од авторите и професор на Империал колеџот во Лондон.

Стероидите не се лек, но помагаат во подобрување на исходот и истовремено да се олеснат проблемите за снабдување на болниците со лекови.

Со оглед дека е дизајниран за истовремено тестирање на повеќе комбинации на потенцијални терапии, за разлика од традиционалната, забавена постапка на клиничко испитување кое тестира една по една терапија, REMAP-CAP е особено погоден за брзо идентификување на ефекасни третмани за време на пандемија.

Во моментов се тестираат илјадници режими на лекување, вклучувајќи различни дози и комбинации на витамин Ц, конвалесцентна плазма, препарати за разредување на крвта, антивирусни средства, имуно модулатори.

Од друга страна, REMAP-CAP и други студии за кортикостероидите не тестирале лекови кај пациенти со полесна клиничка слика на КОВИД-19. Во моментов на овие пациенти не им се препорачуваат стероиди, бидејќи тие можат да го ослабнат имунитетот и да имаат сериозни несакани ефекти.