Се претпоставува дека секоја петта жена во некој период од животот ќе се соочи со пореметување на работата на тироидната жлезда, а бројот на заболени мажи е се поголем, тврдат стручни лица. Освен генетката, појавувањето на болеста на штитната жлезда е предизвикано и од стресниот живот, неправилната исхрана и проментите во хормоналниот статус како бременост и менопауза. Пореметувањето во работата на оваа важна жлезда денес е втор по ред на честота ендокринолошки проблем, по дијабетесот.
Оваа жлезда, која регулира многу процеси во телото, може да предизвика многу здравствени проблеми. Тироидната жлезда е една од поголемите жлезди во човечкото тело и се наоѓа во предниот дел од вратот. Таа се состои од два дела (лобуси) поврзани со еден потесен дел (истмус). Оваа жлезда учествува во контролата на метаболизамот и терморегулацијата, ја одредува осетливоста на телото кон другите хормони. Игра многу важна улога во детството, во растот и диференцирањето на многу ткива.
Необјаснета промена во тежина е еден од најчестите знаци за растројство на тироидната жлезда. Зголемување на телесната тежина може да биде сигнал за ниско ниво на тироидните хормони, состојба наречена хипотироидизам. Спротивно на тоа, ако тироидната жлезда произведува повеќе хормони отколку што телото има потреба, можете да изгубите тежина неочекувано. Ова е познато како хипертироидизам.
Отокот или проширувањето во пределот на вратот е видлива индикација дека нешто не е в ред со тироидната жлезда. Гушавоста може да се појави при појава на хипотироидизам или хипертироидизам. Понекогаш отоците во пределот на вратот може да резултираат од карцином на тироидната жлезда или нодули, грутки, кои растат во тироидната жлезда.
Тироидните хормони влијаат на речиси секој орган на телото и може да влијаат на работата на срцето и да бидат причина за брзо отчукување. Луѓето со хипотироидизам може да забележат дека нивното срце побавно отчукува, додека кај луѓето со хипертироидизам се појавува забрзување на отчукувањето на срцето. Нарушената функција на тироидната жлезда може да предизвика и зголемен крвен притисок.
Хипотироидизам има тенденција да се направи луѓето да се чувствуваат уморни, слаби и депресивни. Хипертироидизам, пак, може да предизвика вознемиреност, проблеми со спиењето и раздразливост.
Губењето на косата, жештините во телото или, пак, постојаното чувство на студ се знаци дека тироидните хормони се надвор од рамнотежа. Бидејќи промените во тироидната жлезда може да предизвикаат и промени во менструалниот циклус и расположението, симптомите понекогаш се помешаат со менопауза. Ако се сомневате на проблеми со тироидната жлезда, преку крвна анализа може да се утврди дали вистинскиот виновник е менопауза или растројство на тироидната жлезда – или, пак, комбинација од двете. Ако се сомневате дека имате симптоми за нарушување на работата на тироидната жлезда, прашајте го вашиот лекар за потребните анализи.
