Најчесто се зборува и се споменува биолошкиот часовник на жените, сепак во последно време се почесто се предупредуваат и мажите – дека ако сакаат да станат татковци тоа треба да го направат до 40 година од животот. Оваа возраст е најдобра за добивање здраво потомство, затоа што подоцна децата ќе имаат поголем ризик од добивање сериозни болести.
Специјалистите за плодност велат дека мажите не се имуни на репродуктивното стареење, како што се мислело порано, па се советува семејството да се комплетира до 40 година од животот за да се намалат шансите децата да се родат со Даунов синдром, ментални болести или аутизам.
Во студија во која било анализирано влијанието на татковите години и начинот на живот врз здравјето на детето, се наведува дека мажите на возраст од 40 и повеќе години имаат шест пати поголема шанса да имаат аутистични деца отколку татковците помлади од 30 години. Така е затоа што се докажало дека со годините спермата станува пооштетена.
Загрижувачки е тоа што и некои од ефектите се пренесуваат на следните генерации, па со овие болести би можеле да бидат погодени и внуците. Студијата објавена во магазинот „Stem Cells“ предупредила и на количеството алкохол кое мажите го пијат, а кое може да влијае на поколенијата. На бебето може да му биде детектиран фетален алкохолен спектар, кој предизвикува проблеми со концентрацијата, хиперактивноста и слаба координација, и во случаите кога и мајката пиела. Консумирањето алкохол е поврзано со помали мозочиња кај бебињата и пониска интелигенција.
