Нивото на антитела кај пациентите кои се опоравиле од КОВИД-19 кај британската популација брзо паѓачи во текот на летото, покажало британско истражување кое упатува на тоа дека имунитетот по инфекцијата можеби и не трае толку долго и така се намалува и можноста за колективен имунитет.
Ова се резултатите од студијата што ја спровеле научниците од Империјал колеџот во Лондон, за следење на нивото на антитела меѓу Британците, по првиот бран од инфекцијата со КОВИД-19 во март и во април.
Од 20. јуни до 28. септември, Империјал колеџот следел 350 000 случајно избрани жители на Англија, кои редовно се тестирале дома за да утврдат дали имаат антитела на КОВИД-19.
Резултатите покажале дека антителата побрзо исчезнале кај лицата кои немале симптоми на болеста, отколку меѓу пациентите кај кои болеста се манифестирала со послаби или поизразени симптоми.
“Во тој период, преваленцијата на антитела меѓу позитивно тестираните на КОВИД-19 се намалила од 6% кон крајот на јуни, на 4,4% во септември, што укажува на намалување на колективниот имунитет пред почетокот на вториот бран на инфекцијата кој во последните седмици резултираше со локални карантини и рестрикции во Велика Британија“, се вели во студијата.
Помеѓу јуни и септември, процентот на лица постари од 75 години со антитела се намалил за 39%, а меѓу младите од 18 до 24 години за 14,9%.
“Со оглед на она што го знаеме за останатите коронавирус, овие податоци упатуваат на тоа дека со исчезнувањето на антитела, паѓа и имунитетот, што резултира со пад на општиот имунитет на ниво на популација“, вели Венди Баркли, раководител на Одделот за инфективни болести на лондонскиот Империјал колеџ.
Кај лицата кај кои инфекцијата е потврдена со ПЦР тест, воочен е помалку изразен пад на антитела во споредба со пациентите кои биле асимптоматски и не знаеле дека се заразени.
“Вооченото брзо намалување на антителата нужно не влијае на ефикасноста на кандидатите за вакцина кои во моментов се во фаза на клинички испитувања. Квалитетната вакцина може да биде и подобра од природно стекнатиот имунитет“, појаснува Баркли.
