Дури и една непроспиена ноќ може да предизвика моментално и значајно наталожување на бета-амилоид во мозокот, покажала новата студија. Инаку, акумулација на бета-амилоид во мозокот веќе долго време се поврзува со развојот на Алцхајмерова болест, пишува „Proceedings of the National Academies of Sciences“.
Треба да се напомене дека и некои поранешни студии направени врз животни сугерирале на потенцијалната врска помеѓу недостатокот на сон и насобирањето на бета-амилоид во мозокот.
Исто така, било откриено дека после непроспиена ноќ доаѓа до таложење на бета-амилоид во регионите на мозокот кои се важни за памтење и размислување – хипокампусот и таламусот.
Недоволниот сон не само што ја поттикнува акумулацијата на бета-амилоид, туку и оневозможува отпадните материи да се отстранат од мозокот за време на спиењето. Имено, за време на спиењето, доаѓа до намалување на големината на невроните и се создава простор помеѓу нив, кој им овозможува на отпадните материи да бидат полесно отстранети од мозокот.
