Невенот е билка која најмногу се користи во фитотерапијата. Од цветот на невен се прават масла, масти, креми, лековити тинктури и чај. Оваа билка поради значителното количество флавоноиди што го содржи има широко антивоспалително дејство, па се препорачува за лекување на разни инфекции во човековиот организам.
На пример, невенот содржи линолна киселина која делува противвоспалително и помага при воспаление на грлото, но и кај чирови и осип.
Истражувањата покажале дека геловите и мастите со невен ефикасно го забрзуваат опоравувањето на кожата и зацелувањето на раните, како и дека помагаат кај хемороиди. Исто така, благодарение на релаксирачкото дејство невенот помага и при грчеви во мускулите и менструални болки. Заради сето ова и е битна состојка на разно-разните мешавини за чаеви со чија помош се отстрануваат тегобите во дигестивниот тракт – ги зацелува раничките на желудникот и дванаесетпалечното црево, се нормализира работата на црниот дроб и лачењето на жолчката, а присуството на танини, пак, ја оправдува употребата на невенот за запирање поблаги дијареи.
Истражувањата укажале и на силното фунгицидно дејство на невенот, односно дека оваа билка може да помогне при проблеми со кандидата подеднакво делотворно како и лековите што се користат во лекувањето на оваа честа габична инфекција.
Откриено е и дека оваа билка има способност да ги прочистува крвните садови и да го намалува нивото на холестерол во крвта, а некои понови истражувања покажале дека го намалува крвниот пристисок и делува благо седативно затоа што ги релаксира крвните садови и го зголемува луменот, па затоа и се препорачува кај ангина пекторис. Се смета и за добар растителен антиспазматик (ги разбива грчевите), а оваа особина помага во отстранувањето на грчевите во матката и истовремено ја зајакнува, што доведува до олеснување при болни менструации. Исто така, ги ублажува и грчевите на дишните патишта, па е од голема помош и кај астма.
