Британските доктори предупредуваат да не се блокира протокот на воздух низ устата и носот при кивање, препорака која доаѓа по неодамнешниот случај на 34-годишен маж со руптура во грлото, кој го затнал носот и ја затворил устата обидувајќи се да го запре кивањето.
Дотогаш „здравиот и во добра форма“ човек бил примен во болница како итен случај, откако се пожалил на болно голтање и промена на гласот по силно кивање, напишаа докторите во списанието „British Medical Journal“, опишувајќи го случајот.
„Откако се обидел да го спречи кивањето со стискање на носот и затворање на устата, рече дека му се чинело како нешто да му излегло на вратот“, изјавија докторите од Универзитетската болница „Leicester NHS Trust.“
Оториноларинголозите побарале знаци на надворешни повреди и ја исклучиле можноста дека проголтал некој остар предмет пред да утврдат дека неговата состојба е предизвикана од кивање. Запирањето на кивање со блокирање на ноздрите и устата е опасен маневар и треба да се избегнува, велат докторите.
Спречувањето на кивање на тој начин би можело да доведе до „бројни компликации“, како што е пневмомедијастинум – состојба која е резултат на навлегување на воздух во празнината околу срцето и другите органи, перфорација на ушното тапанче, па дури и церебрална аневризма, предупредуваат лекарите.
Со запирање или задржување на кивањето целиот притисок се сели во ушите каде што може да дојде до оштетување. Може да предизвика губење на слухот и вртоглавица која нема брзо да престане.
Може да страдаат и крвните садови во очите, а се случува и да се оштети дијафрагмата. Посилен налет па стопирање на кивањето е потенцијална опасност од повреди на вратот, како и свежи рани кај луѓето кои неодамна ги оперирале синусите. Во најлош случај, доаѓа до пукање на крвните садови во мозокот и мозочниот удар, што може да биде смртоносно.
Затоа ако ви дојде да кивнете во јавност, не срамете се бидејќи цената што можете да ја платите не е вредна за тоа. Наместо воздржување, ставете марамче врз носот и кивнете „како човек”. Ако не стигнете да извадите марамче, покријте ги носот и устата со подлактицата.
