Вирусот SARS-CoV-2 може да навлезе во ткивото на пенисот на заразеното лице и потенцијално да предизвика трајна еректилна дисфункција, покажало прелиминарно истражување, спроведено во рамките на програмата за репродуктивна урологија на Медицинскиот факултет при Универзитетот во Мајами.
Проф. Ранјит Рамасами, автор на истражувањето објавено во научното списание World Journal of Men’s Health, ги проучувал разликите во ткивото на пенисот кај мажи кои прележале КОВИД-19 и оние кои немале коронавирусна болест.
Од претходно е познато дека новиот коронавирус може да ги оштети крвните садови, што може да доведе до оштетувања на ткивата што тие садови ги снабдуваат, а тоа се однесува и на сунѓерастото ткиво внатре во машкиот полов орган.
“Во нашата пилот-студија откривме дека мажите кои претходно не се жалеле на еректилна дисфуникција, развиле сериозни случаеви на еректилна дисфункција по појавата на КОВИД-19 инфекција“, вели проф. Рамасами.
“Темелната ендотелна дисфункција, до која доаѓа поради влез на КОВИД-19 во ендотелните клетки, може да погоди бројни органи, вклучувајќи го и пенисот“.
Со оглед дека во оваа пилот студија се работи само за четири евидентирани случаи, мажи кои се пријавиле за вградување на протеза во пенисот поради еректилна дисфункција, проф. Рамасами истакнува дека се потребни понатамошни истражувања.
Но, тој ги предупредува сите мажи кои по инфекцијата развиле проблеми со ерктилна дисфункција, да се јават кај лекар специјалист.
