Омикрон се размножува поинаку од останатите варијанти на коронавирусот во дишните патишта и во бели дробови, објавија вчера научниците, додавајќи дека ова сознание може да помогне во предвидувањата на делувањето на омикрон и последиците што ги остава на здравјето. Тие појаснуваат дека омикрон побрзо се размножува во дишните патишта, а побавно во самите бели дробови.
Во споредба со претходната варијанта на коронавирусот, делта, омикрон се размножува 70 пати побрзо во ткивата кои ги обложуваат дишните патишта, што може да го олесни неговото пренесување од лице на лице, велат научниците.
Но, во белодробните ткива омикрон се реплицира 10 пати побавно од изворната, првична верзија на коронавирусот, што би можело да резултира со развој на помалку тешка форма на болеста.
Во соопштението објавено од Универзитетот во Хонг Конг, авторот на студијата д-р Мајкл Чан Чи-ваи пишува: “Важно е да се напомене дека тежината на болест што се развива кај луѓето не се одредува само со репликацијата на вирусот, туку и од имунолошкиот одговор на поединецот на инфекција, која понекогаш се развива во воспаление опасно по живот“.
Конечната стручна рецензија на официјалниот извештај за резултатите од истражувањето за омикрон е во тек, по што тимот на истражувачи од Хонг Конг ќе го објави во стручно списание.
“Ако зарази поголем број луѓе, овој високо заразен вирус може да предизвика потешка форма на болеста, па и смрт, иако самиот вирус е веројатно помалку патоген. Затоа, ако ги земеме предвид резултатите од сите неодамнешни студии кои покажуваат дека омикрон може делумно да го избегне природно стекнатиот имунитет, како и оној што се постигнува со вакцинација, севкупната закана од оваа варијанта многу веројатно би можела да биде висока“, вели Чан Чи-ваи.
Омикрон поцврсто се прилепува за клетките
Начинот на кој омикрон се врзува за клетките и антителата фрла нова светлина врз неговото однесување и може да помогне во создавањето неутрализирачки антитела, велат научниците.
Користејќи компјутерски модели на шилест протеин на површината на омикрон, стручњаците ги анализирале молекуларните интеракции што се случуваат кога шилестиот протеин се врзува за ACE2 рецепторите, што на вирусот му овозможува влегување во клетката.
“Оригиналниот вирус само се ‘ракуваше’ со АЦЕ2 протеинот, а во случајот со омикрон, таа интеракција повеќе личи на интеракција на пар кој се држи за раце со испреплетени прсти“, сликовито објаснува Џозеф Лубин од Универзитетот Рутгерс во Њу Џерси.
Четири од 10 заразени несвесно го шират вирусот
Асимптоматските инфицирани лица можат значајно да придонесат во преносот на SARS-CoV-2, со оглед на тоа што чинат 40,5 отсто од потврдените инфекции во целиот свет, покажуваат резултати од друга студија објавена пред два дена во списанието JAMA.
Научниците обединиле податоци од 77 претходно спроведени студии во кои беа вклучени вкупно 19.884 лица со потврдена SARS-CoV-2 инфекција.
Утврдиле дека околу 40 отсто од заразените се асимптоматски лица. Исто така, откриени се 54 отсто заразени трудници, 53 отсто патници заразени за време на патување со авион или на крстарење, 48 отсто заразени штитеници во пензионерски домови и 30 отсто заразени во здравствените установи.
