Истражувачи од Универзитетот во Јужна Калифорнија велат дека откриле дека симптомите на КОВИД-19 имаат тенденција да се појавуваат по одреден редослед, откритие кое може да овозможи порано откривање и лекување кај бројни пациенти.
Според студијата објавена во медицинското списание Frontier Public Health најчестиот редослед на симптомите е следниов:
- Треска
- Кашлица
- Болка во мускулите
- Мачнина и/или повраќање
- Дијареа
Стручњаците велат дека првите три симптоми и не мора да се појават во низа, туку може да се јават сите истовремено, а потоа да дојде до појава на мачнина и повраќање, проследено со дијареа (пролив).
Сите пациенти не ја искусиле истата група на симптоми. Но, новите сознанија помагаат да се нагласи во што КОВИД-19 се разликува од останатите веќе познати болести. Иако треската и кашлицата се поврзани и со други бројни болести, како грипот, студијата потенцира дека временскиот период во кој тие симптоми се појавуваат и подоцна и гастроинтестиналните симптоми го одвојуваат новиот коронавирус.
“Разбирањето на редоследот на симптомите на вирусот е многу корисно за време на ‘преклопувачките циклуси на болестите’, како што е престојната сезона на грип“, вели проф. д-р Питер Кун, еден од авторите на студијата.
Тој вели дека лекарите на овој начин може да предвидат каква ќе биде состојбата на пациентот, а идентификувањето на оние лица кои не се заразени со коронавирусот на основа на овој редослед ќе помогне и околу растоварување на здравствениот систем.
Истражувањето опфатило симптоми на над 55.000 потврдено заразени лица, чии податоци ги собрала Светската здравствена организација. Тие биле споредувани со случаи на грип и други болести.
