Коронавирусната болест ги зголемува ризиците од смрт во болница кај лица хоспитализирани поради мозочен удар, покажало ново американско истражување.
Пациентите заболени од КОВИД-19 имаат поголеми шанси за тежок мозочен удар, како и за нов мозочен удар во текот на хоспитализацијата, информираат научниците во списанието Stroke.
Тие проучувале речиси 42.000 пациенти кои биле згрижени во 458 болници со исхемичен мозочен удар, предизвикан од запушување на артериите кои доведуваат крв во мозокот.
Околу три проценти од тие пациенти биле позитивни на КОВИД-19. Тие во болница во просек стигале еднакво брзо како и пациентите кои не биле болни од КОВИД-19. После тоа, работите би забавиле за инфицираните со новиот коронавирус.
“Веројатно поради потребата за користење на лична заштитна опрема и други превентивни мерки што ги спроведуваат вработените во болница, било потребно повеќе време да заболените од КОВИД-19 добијат терапија за разбивање на крвните згрутчувања“, вели коавторот на студијата, д-р Грег Фонароу од Универзитетот Калифорнија во Лос Анџелес.
Со студијата не можело да се докаже дека одложувањата во терапиите предизвикале полош исход за заболените од КОВИД-19.
Но, Фонароу вели дека тие откритија сугерираат дека постои потреба од дополнително засилување на протоколот за лицата кои се погодени со мозочен удар, за да се обзбеди навремена дијагноза и брзо лекување на лицата со исхемичен удар со истовремена заштита на здравствениот персонал од изложување на коронавирусот.
