Студија на научници од Минхен сугерира дека антителата против новиот коронавирус не се задржуваат во телото подолго од неколку месеци, што ја доведува во прашање ефикасноста на евентуланата вакцина или долгорочниот имунитет.
Тестовите на болните лекувани во болницата Швабинг во Минхен покажале значаен пад на брјот на неутрализирачки антитела во крвта, изјавил Клеменс Вендтнер, виш советник на одделот за заразни болести во болницата.
“Кај четири од девет пациенти воочивме пад на неутрализирачките антитела на многу специфичен тест кој може да се направи во лабораторија со висока безбедност. Сега дури може да се шпекулира за влијанието на тоа откритие на долгорочниот имунитет и стратегијата за развој на вакцина“, вели Вендтнер.
Резултатите сугерираат дека пациентите кои се опоравиле можат повторно да се заразат со вирусот, но потребни се дополнителни тестови за тоа да се повтврди, додава тој.
Телесниот имунитет го составуваат Б-клетки одговорни за антитела и Т-клетки кои го помагаат уништувањето или можат сами да ги уништат патогените кои научиле да ги препознаат откако организмот бил изложен на првата инфекција. И двете групи се одговорни за долготраен имунитет.
Ова откритие на д-р Вендтнер е во склад со други претходни истражувања во светот. Кинеските научници во списанието Nature информираа дека присутноста на антитела на коронавирусот во крвта значајно паѓа по два месеци. Тоа посебно се однесува за асимптоматските пациенти кои произведуваат помалку антитела и затоа имаат послаба имуна реакција.
