“Иако омикрон варијантата се покажува како позаразна во однос на другите варијанти на вирусот SARS-CoV-2, испитувањата од Јужна Африка, Обединетото Кралство и одредени земји членки на ЕУ укажуваат на помал ризик од хоспитализација по инфекција со омикрон варијантата“, наведуваат од Агенцијата.
“Врз основа на достапните и направени испитувања, во моментов се проценува дека омикрон варијаната претставува помеѓу една третина и половина од ризикот во однос на делта варијантата“, дополнуваат експертите.
Резултатите од неодамна објавените истражувања покажуваат дека ефективноста на вакцините против симптоматска болест е помала при омикрон инфекција, отколку со другите варијанти и дека ефикасноста слабее со текот на времето. Како резултат на тоа, повеќе вакцинирани луѓе веројатно ќе развијат болест предизвикана од варијантата омикрон.
“Меѓутоа, студии покажуваат и дека вакцинацијата се уште обезбедува високо ниво на заштита од тешка форма на болеста и хоспитализации поврзани со омикрон варијантата. Најновите докази, кои вклучуваат податоци за ефикасноста на вакцините во општа употреба (real-world data), исто така упатуваат на тоа дека лицата кои примиле бустер доза вакцина се подобро заштитени од лицата кои ја завршиле примарната вакцинација и не примиле бустер доза“, објави Агенцијата.
“Податоците од Јужна Африка покажуваат дека лицата кои примиле две дози вакцина против КОВИД-19 имаат до 70% заштита од хоспитализација. Слични податоци од Обединетото Кралство покажуваат дека, иако заштитата опаѓа неколку месеци по вакцинацијата, заштитата од хоспитализација повторно се зголемува на 90% по бустер дозата“, велат стручњаците.
ЕМА ќе продолжи да ги проценува податоците за ефикасноста на вакцините и сериозноста на болеста, како и податоците поврзани за присутните варијанти и природната изложеност на омикрон, кога овие податоци ќе станат достапни. Исходот од овие проценки може да влијае на идните стратегии за вакцинација што ги препорачуваат стручњаците.
