ОБЈАВЕНИ НОВИ УПАТСТВА: СЗО повикува на повеќе докази за пренесување на новиот коронавирус преку воздух

СЗО вели дека вирусот се шири преку директен или индиректен контакт со контаминирани површини или во близок контакт со инфицирани лица.коронавирус

Светската здравствена организација (СЗО) вчера вечер објави нови насоки за коронавирусот кои признаваат некои извештаи за пренос на вирусот преку аеросоли, но засега не сака да даде конечна потврда дека вирусот се пренесува преку воздух.

Во најновите насоки за пренесување на вирусот, СЗО ги признава новите сознанија дека во преполни простори постои можност за пренос на вирусот преку аеросоли, на пример за време на групно пеење (хор) , во ресторани или во сали за фитнес.

Со тоа одговори на отвореното писмо на 239 меѓународни научници кои ја повикаа СЗО и меѓународната медицинска јавност да “признаат постоење на можност вирусот да се пренесува преку воздух“.

Но, СЗО додава дека “итно се потребни дополнителни истражувања“.

НЕМА ЦВРСТИ ДОКАЗИ

Експертите од СЗО велат дека новиот коронавирус кој ја предизвикува болеста КОВИД-19 се шири  преку директен или индиректен контакт со контаминирана површина или во близок контакт со инфицирани лица кои вирусот го шират преку плунка, респираторни секрети или капки кога заразеното лице кашла, кива, зборува или пее.

“Тоа е чекор во вистинска насока, иако е мал, бидејќи станува јасно дека пандемијата силно се шири и најдобро објаснување за таквото случување е аеросолниот пренос“, вели Хозе Хименез, хемичар на Универзитетот Колоради, еден од потписниците на писмото објавено во понеделникот со списанието Clinical Infectious Diseases.

Не е јасно колку често коронавирусот се шири преку воздуд, за разлика од најчестото капково ширење со кашлање и кивање.

Д-р Ентони Фаучи, директор на Националниот институт за алергии и заразни болести во САД, вели дека се уште нема многу цврсти докази за пренос на вирусот SARS-CoV-2 преку воздух, но истакна: “Мислам дека е разумно да се претпостави дека тоа се случува“.

Се верува дека многу мал број на болести се шират преку аеросоли – кои се цврсти мали честички или мали течни капки во воздухот, помали од пет микрометри. Меѓу нив се морбилите и тубркулозата.

СЗО во своите насоки признава дека пренесувањето на заразата може да се случи за време на специфични медицински постапки, на пример кога се прави интубација. Затоа ги советува здравствените работници да носат респираторни маски N95 и друга заштитна опрема кога изведуваат таков зафат кој мора да се прави во соодветно проветрена просторија.

Секоја промена на проценките на Светската здравствена организација за ризикот за пренос на болеста, може да влијае на нејзиниот сегашен совет за одржување на физичко растојание од еден метар.