Истражување објавено во списанието Translational Psychiatry открива дека одењето на одмор, со практикување на медитација и јога, ги зајакнува организмот и имунитетот, го намалува стресот, па дури делува и на гените.
Во истражувањето учествувале 102 жени кои одморале во Калифорнија. Околу половина од нив преку ден практикувале јога или медитација (повеќето од нив претходно не се занимавале со ниту една од овие активности), а другата половина времето го поминувале опуштено, без јога и медитација. Примероци од крв им биле земени на испитаничките и пред и по одморот. Кај двете групи е воочено подобрување во биомаркерите за стареење, како и експресијата на гени, со тоа што резултатите биле нешто подобри кај групата која медитирала.
Кај жените кои редовно медитирале, вредностите на ензимот теломераза, кој помага во подобрувањето на хромозомите, а кои се намалуваат како старееме, биле зголемени.
Психолошката придобивка од одморот, кој секоја испитаничка сама го проценувала, исто така добила високи оценки. Жените кои за време на одморот медитирале и практикувале јога и 10 месеци по одморот пријавиле значајно намалување на стресот и симптоми на депресија. И свесноста долготрајно се подобрува по одморот. Новите истражувања подобро ќе го објаснат овој феномен, но во меѓувреме секако се препорачува повремено заминување на одмор, на некое мирно место во опуштена атмосфера, на кое може да ги одморите и обновите телото, умот и духот.
