Ризикот од хоспитализација за пациентите со омикрон варијантата на коронавирус е дури 40 до 45 проценти помал отколку за пациентите со делта варијантата, покажало истражување на Имперал Колеџот во Лондон, објавено вчера.
“Докази за намалување на ризикот од хоспитализација поради инфекција со омикрон во споредба со инфекција со делта е пронајден во сите случаи во периодот опфатен со истражувањето“, велат истражувачите за студијата која ги анализирала податоците од случаите потврдени со ПЦР тест во Англија помеѓу 1 и 14 декември.
Научниците се тркаат во одговорите на прашањата за вирулентноста на омикрон и тежината, односно сериозноста на болеста со оваа варијанта за да им помогнат на властите да одговорат на омикрон варијантата, која се шири со огромна брзина.
Британското истражување ја следи јужноафриканската студија од средата, која покажа дека кај лицата со потврдена зарза со омикрон во Јужна Африка помеѓу 1 октомври и 30 ноември е 80 отсто помала веројатноста да бидат примени во болница од оние на кои им била дијагностицирана друга варијанта во истиот период.
Научниците од Империал Колежот велат дека ризикот од било какво одење во болница со омикрон бил 20 до 25 проценти помал отколку со делта сојот.
Меѓутоа, додаваат дека при анализата на намалениот процент на хоспитализирани со омикрон варијантата мора да се земе предвид дека постои поголем ризик од омикрон инфекција поради намалената заштита што ја обезбедува и вакцинацијата и прележаната болест.
Научниците оцениле дека нивните проценки од студијата сугерираат дека лицата кои примиле најмалку две дози вакцина останале значително заштитени од хоспитализација, дури и ако заштитата од инфекција во голема мера била изгубена против омикрон варијантата.
Во средата беше објавена и шкотска студија, која исто така ги споредувала инфекциите со омикрон и делта.
Анализата на податоците за заболените со болеста КОВИД-19 предизвикана од делта или омикрон, во ноември и декември, покажала дека “омикрон е поврзан со двотретинско намалување на ризикот од хоспитализација поради КОВИД-19 во споредба со пациентите заразени со делта варијантата“.
Исто така е утврдено дека бустер дозите вакцина обезбедуваат значителна дополнителна заштита од асимптоматска инфекција.
