Истражувањата покажале дека омикрон е почувствителен на имунолошката реакција кај луѓето од делта варијантата, објавија истражувачите од Германија и Велика Британија во списанието Cell Research.
“Во нашето истражување за прв пат е објаснето зошто инфекциите со омикрон поретко предизвикуваат тешки форми на болеста“, објаснува д-р Мартин Микаелис од Одделот за бионаука при Универзитетот во Кент, чиј тим го спровел ова истражување во Универзитетската болница во Франкфурт.
“Се чини дека омикрон, спротивно од делта, не успева да спречи заразените клетки да произведуваат и лачат интерферон, природен протеин заслужен за имунолошкиот одговор што е присутен во сите човечки клетки“, наведуваат истражувачите.
Заразените клетки произведуваат интерферон. Поедноставено, овие материи служат како гласници, кои, меѓу другото, ги информираат останатите клетки за присутност на вирусот.
Според ова истражување, делта сојот се покажал “поуспешен’ од омикрон кога се работи за способноста на клетките да го блокираат производството на интерферон.
Интерферонот е важен за неспецифичниот имунолошки одговор, односно за многу брза и поопшта реакција на имуниот систем во борба против патогените.
Неспецифичниот имунолошки одговор треба да се разликува од специфичниот одговор на кој му е потребно повеќе време да се активира. Со специфичниот имунолошки одговор се создаваат антитела кои постојат за да борат против одреден патоген.
